La regenza ha augmentà las taxas da chatscha per 1,3 pertschient ed uschia adattà quellas a l'index naziunal dals pretschs da consum. Per Svizras e per Svizzers sco er per persunas domiciliadas che abitan en il chantun vul quai per exempel dir concretamain che las taxas da chatscha auta s'augmentan per nov francs a 669 francs e las taxas da chatscha bassa per quatter francs a 269 francs. Il nov reglament da taxas entra en vigur il 1. da zercladur. L'ultima giada èn las taxas da chatscha vegnidas adattadas la primavaira 2003.

Contribuziuns chantunalas a differentas instituziuns
- Fundaziun arcus raetiae: Per il festival da cultura xong la fin da fanadur en la regiun da cunfin dals trais pajais Val Müstair/Engiadina bassa, Oberes Gericht e Vnuost sura ha la regenza concedì ina garanzia da deficit da 20'000 francs.
- Club da beachvolley Calanda: Per construir il nov stabiliment tripel da beachvolley a Cuira survegn il club ina contribuziun chantunala da 14'500 francs.

Projects da vias
- Via dal Güglia e via sursilvana: Per la correcziun da la via en il vitg da Tinizong sco er per il traject Prau Pulté en connex cun il sviament da Flem ha la regenza concedì totalmain ca. 2,1 milliuns francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun