Charlotte Schütt è la nov elegida responsabla per il marketing da la
cultura tar l'uffizi da cultura. Ella cumenza sia plazza il 1. da mars
2005. En il center da sia lavur stattan la planisaziun e la realisaziun
dal punct central da svilup "commerzialisaziun da la cultura" che la
regenza ha concludì. Qua duai vegnir furmada tranter auter ina sutmarca
da "grischun" specifica per la cultura e creads chanals per la
derasaziun intenziunada d'activitads culturalas en il Grischun. Il medem
mument sustegna Charlotte Schütt ils trais museums chantunals en lur
lavur areguard il marketing e las relaziuns publicas.
Charlotte Schütt (47) è geografa e museologa diplomada ed ha
experientschas multifaras en differents secturs da la cultura che la
qualifitgeschan en moda optimala per la nova plazza. Ses emprims merits
ha ella gudagnà tar il museum al liber a Ballenberg, nua ch'ella ha
collavurà durant in temp da svilup fitg intensiv a projects ils pli
differents sco exposiziuns, publicaziuns, concepziuns e realisaziuns
d'occurrenzas. Ella è er stada responsabla per las relaziuns publicas. A
partir dal 1989 ha lavurà Charlotte Schütt tar il center svizzer da film
(oz "swiss films"), in post da promoziun per il film svizzer en Svizra
ed a l'exteriur. Qua ha ella gia rimnà experientschas cun il marketing
da cultura ed è stada participada essenzialmain a divers novs projects,
tranter auter al premi da film svizzer. Dapi stgars quatter onns maina
ella il "Mühlerama" a Turitg, in museum stimà d'in grond circul da la
populaziun. Quel museum preschenta in vegl mulin industrial cun
in'exposiziun speziala davart temas che reguardan il mangiar e la
cultura da la vita da mintgadi.
Dapi la fin dals onns 80 è Charlotte Schütt colliada stretgamain cun
il Grischun ed enconuscha bain il chantun e sia cultura. Ella ha abità
ditg a Malans ed a Cuira ed è s'engaschada durant quest temp en
differentas uniuns culturalas. Uschia ha ella fundà tranter auter il
secretariat da l'associaziun dals museums grischuns. Da
quell'associaziun è ella anc adina vicepresidenta.
Persuna che dat infurmaziuns
Flavia Kippele, manadra da l'uffizi da cultura, tel. 081 257 27 17
Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da
l'ambient