La regenza ha approvà la concessiun dal dretg da las auas sco er il
project da renovaziun per l'ovra electrica Islas. Uschia po l'ovra
idraulica existenta da la l'ovra electrica San Murezzan (OESM) vegnir
manada anc per ulteriurs 60 onns.
Ils 20 da mars 2000 ha la vischnanca da Schlarigna dà a la
vischnanca da San Murezzan ina nova concessiun per trair a niz la forza
idraulica da l'En en la centrala Islas. La vischnanca da San Murezzan ha
acceptà il project d'utilisaziun sco er il project da renovaziun per
l'ovra electrica communala a la votaziun a l'urna dals 24 da settember
2000. La concessiun ed il project da renovaziun èn vegnids approvads da
la regenza ils 7 da zercladur 2005. Uschia survegn la OESM il dretg da
manar ses implant idraulic a la fin da la chavorgia da Charnadüra per
ina durada d'ulteriurs 60 onns.
La planisaziun da protecziun e d'utilisaziun è vegnida approvada dal
cussegl federal
Per quest nov concessiunament èn stads necessaris scleriments
extendids areguard l'ambient. En quest connex eran las vischnancas da
Schlarigna e da San Murezzan sa decididas da far ina planisaziun da
protecziun e d'utilisaziun ch'era vegnida approvada dal cussegl federal
il cumenzament da favrer da quest onn. Ella cumpiglia ina revalitaziun
ed ina protecziun da la palì planiva Crasta a Schlarigna sco er ina
revitalisaziun da l'ovel da Cangiroulas a San Murezzan per cumpensar il
diever supplementar da l'En en la chavorgia da Charnadüra. Per mitigiar
las fluctuaziuns specificas dal scul en l'En sto la OESM construir
plinavant in lai da gulivaziun en il sectur sut la centrala da l'ovra
electrica.
Optimar l'economia d'energia
L'ovra electrica Islas ha - suenter che la renovaziun è terminada -
ina prestaziun installada da 4.36 megawats e produceschan ina media
annuala da 16.8 milliuns uras kilowat. Grazia a la renovaziun da la
centrala Islas sco er grazia a la planisaziun da protecziun e
d'utilisaziun ch'è vegnida fatga, po vegnir cumpensada la perdita da
producziun sin fundament da las novas prescripziuns da l'aua restanta.
Gremi: regenza
Funtauna: rg departament da construcziun, traffic e selvicultura