Las repostas a la retschertga che l'uffizi forestal dal Grischun ha fatg en il rom da la campagna "il guaud sco lieu da scuntrada" mussan che bleras vischnancas, bleras scolas e blers uffizis forestals organiseschan gia oz numerusas occurrenzas en il guaud cun uffants da scola. Ina gronda part ha l'intenziun da francar la furmaziun da l'ambient en il guaud sco part dal manaschi da scola en vischnanca e da procurar uschia ch'i vegnia instruì en la "stanza da scola dal guaud" er en l'avegnir il guaud e la cultivaziun dal guaud a las scolaras ed als scolars.

Da tge sa tracti?
Ils uffizis forestals da revier, las vischnancas e las scolas èn communablamain responsabels che la furmaziun da l'ambient en il guaud po insumma avair lieu. Pervi da quai è vegnì tramess en il rom da la campagna "il guaud sco lieu da scuntrada" il cumenzament da favrer 2005 in questiunari cun nov dumondas davart il tema "occurrenzas da scola en il guaud" als posts correspundents da tut las vischnancas dal chantun Grischun. Per che tut las parts pertutgadas d'ina vischnanca s'occupian cun il tema, eran las dumondas drizzadas tant a l'uffizi forestal da revier ed a la scola sco er a la suprastanza communala. Quai cun l'intent ch'ils questiunaris vegnian emplenids e returnads communablamain. Las dumondas tanschevan da "Datti en Vossa vischnanca gia occurrenzas da scola cun il selvicultur en il guaud" fin a "È Vossa vischnanca pronta da s'engaschar en il futur regularmain per occurrenzas da scola en il guaud e da francar quest engaschament sin plaun communal?".

Finamiras da la retschertga
La retschertga aveva trais finamiras principalas:
- infurmar las parts principalas pertutgadas davart la campagna
- survegnir in maletg davart l'interess per quest tema e davart activitads d'enfin ussa cun uffants en il guaud
- rimnar documents tar l'uffizi forestal dal Grischun ed als metter a disposiziun per promover uschia il barat d'ideas e d'experientschas

Il return
En tut èn vegnids distribuids 518 questiunaris. 109 exemplars als uffizis forestals da revier, 209 a las vischnancas e 210 a las scolas. Dals selviculturs èn vegnids returnads 66 (61%) questiunaris, da las vischnancas 132 (63%) e da las scolas 72 (34%). Resguardond tut ils adressats munta il return a 51%. Tuttina èn 63% da las vischnancas s'exprimidas davart quest tema. 168 parts participadas han returnà lur questiunaris emplenids communablamain ed en trais.

Ils resultats
Ils resultats mussan che 78.4% da las parts contactadas organiseschan gia occurrenzas da scola en il guaud. Quasi tut las parts (97.7%) han il basegn da manar tras occurrenzas da scola en il guaud er en l'avegnir. En quest connex èn 98.9% dals selviculturs pronts da cuvrir sezs quest basegn cun la scola da lur vischnanca(s). 50% vulessan perquai profitar da l'agid da vischnancas vischinas u da pedagogas e da pedagogs da guaud externs. 77% vesan la pussaivladad da sustegnair autras vischnancas tar occurrenzas da scola. Ils trais temas per occurrenzas ch'èn vegnids numnads il pli savens èn las "funcziuns dal guaud", il "guaud sco lieu per far experientschas" e "far lavurs simplas en il guaud".
53.4% da quellas parts che han respundì vulan s'engaschar per realisar regularmain en il futur occurrenzas da scola en il guaud. In sustegn dal servetsch chantunal forestal (uffizi forestal dal Grischun) vegn giavischà da 47.7%. Dumandadas vegnan oravant tut documentaziuns didacticas e contribuziuns finanzialas.

Co vai vinavant?
Las respostas survegnidas mussan in maletg per gronda part positiv. Er quellas parts che n'han fin ussa anc betg organisà occurrenzas èn da l'avis che tals guids en il guaud sajan impurtants per tuts. Ils uffants emprendan ad enconuscher il guaud e la tgira dal guaud e vesan sco votantas e sco votants futurs tge lavurs impurtantas ch'il servetsch forestal ed il persunal forestal da la vischnanca prestan en il servetsch da la publicitad.
Igl è da sperar che la campagna "il guaud sco lieu da scuntrada" haja motivà bleras vischnancas, bleras scolas e blers uffizis forestals d'organisar communablamain e regularmain talas occurrenzas. Numerus rapports actuals en las medias davart talas activitads mussan ch'in bun cumenzament è almain vegnì fatg.
L'evaluaziun detagliada da la retschertga chattais Vus sin la homepage da l'uffizi forestal dal Grischun (www.wald.gr.ch sut Aktuell).

Persuna che dat infurmaziuns: Stefan Crollet, Loestrasse 14/16, Cuira, tel. 081/257 38 53, praktikant2.chur@wald.gr.ch

Organ: uffizi forestal
Funtauna: rg uffizi forestal dal Grischun