Las prescripziuns da chatscha 2005 cuntegnan - cumpareglià cun l'onn passà - intginas midadas. Il squitsch da chatscha sin ils chavriels duai vegnir reducì in zic. Mesiras spezialas èn inditgadas tar la chatscha da chamutschs en il territori dal Signina. Cun ina reducziun da la taxa fundamentala duai la participaziun a la chatscha speziala la fin d'atun vegnir augmentada cleramain. Er quest onn vegn fatg chatscha sin il tschierv cun curuna da domaduas varts durant dus dis.
Las spezias da selvaschina d'ungla sco il tschierv, il chavriel, il chamutsch ed il capricorn han survivì bain l'enviern passà. Las emnas passadas èn vegnids bittads ils animals giuvens tar bunas relaziuns. Il chantun grischun ha in effectiv da selvaschina d'ungla bun e per gronda part saun. Per cuntanscher las finamiras da la planisaziun da la chatscha che prevesa per la gronda part da las regiuns e da las spezias da selvaschina ina stabilisaziun dals effectivs, èsi necessari da far las intervenziuns da chatscha correspundentas.

Spustar il squitsch da chatscha da la chavrola sin il chavrielin - scursanir il temp da chatscha
L'effectiv da chavriels è actualmain bainquant pli bass ch'ils onns 90. Quai vegn en emprima lingia chaschunà dals envierns dirs. En vista a questa situaziun da l'effectiv vegn reducì il squitsch da chatscha sin ils chavriels. La chatscha da chavriels vegn scursanida per 4 dis ed il squitsch da chatscha sin las chavrolas vegn reducì uschia e cun mesiras supplementaras. La finamira a lunga vista duai esser ina chatscha reducida da chavrolas ed in squitsch da chatscha pli grond sin chavrielins il november. In spustament dal squitsch da chatscha sin ils animals giuvens ha per consequenza - sco tar ils tschiervs uschia er tar ils chavriels - ch'ins sto registrar main perditas tras selvaschina disgraziada en envierns dirs.

Mesiras spezialas tar la chatscha da chamutschs en il territori dal Signina
Il decurs da l'onn passà han ins stuì constatar in'epidemia agressiva da la tschorvadad da chamutschs sin la cresta tranter la Stussavgia e la Val Lumnezia. Quella ha chaschunà in grond dumber da selvaschina disgraziada ed ha reducì l'effectiv da chamutschs en il territori numnà per var in quart fin in terz. Per augmentar puspè l'effectiv da chamutschas en quel territori vegn reducida l'intervenziun da chatscha. En il senn d'ina mesira speziala vegn scursanida la chatscha da chamutschs da 17 a 9 dis ed i vegn dada libra mo ina chaura-chamutsch per chatschadura u per chatschadur.

Chatscha da tschiervs - augment da la participaziun vi da la chatscha d'atun
Sin basa da la documentaziun avant maun (dumbraziuns, predas, selvaschina disgraziada, valitaziun qualitativa) ston ins partir d'in effectiv da primavaira da var 13'000 animals. L'effectiv da tschiervs na duai betg pli crescher. La chatscha en duas fasas - chatscha auta e chatscha d'atun - è sa cumprovada ed è la clav necessaria per stabilisar l'effectiv da tschiervs. Per realisar las chatschas d'atun organisadas regiunalmain a termin uschè curt ed en moda uschè effizienta sco pussaivel sto vegnir augmentà il dumber da participantas e da participants. Schebain che passa 2'000 chatschaduras e chatschadurs grischuns s'annunzian per questa chatscha, sa participescha mintgamai mo var la mesadad da las chatschaduras e dals chatschadurs annunziadas a questa chatscha. Cun ina clera reducziun da la taxa fundamentala a 100.- francs duai il dumber da participantas e da participants - ed uschia il squitsch da chatscha - vegnir augmentà.
La chatscha sin il tschierv cun curuna da domaduas varts duai esser permessa er quest onn - sut cundiziuns restrictivas - durant dus dis, numnadamain ils 16 ed ils 17 da settember.

Persunas che dattan infurmaziuns
- dr. Georg Brosi, schef da l'uffizi da chatscha e pestga dal Grischun, Loëstr. 14, 7001 Cuira, 081 257 38 91
- Hannes Jenny, biolog da selvaschina, uffizi da chatscha e pestga dal Grischun, Loëstr. 14, 7001 Cuira, 081 257 38 93
- Gion Cotti, servetsch giuridic dal departament da construcziun, traffic e selvicultura, Stadtgartenweg 11, 7001 Cuira, 081 257 36 13

Gremi: uffizi da chatscha e pestga
Funtauna: rg uffizi da chatscha e pestga