Avant in onn ha la regenza preschentà il concept general «rumantsch
grischun en scola» ed incumbensà il departament d'educaziun da lantschar
la fasa da realisaziun. Tgeninas èn las lavurs centralas ch'èn vegnidas
exequidas l'onn 2005?
- Post da stab didactic: Il pedagog Rico Cathomas è vegnì incumbensà
da definir las finamiras per ils singuls stgalims da la scolaziun e da
la furmaziun da la magistraglia.
- Las emprimas vischnancas da pionier: Suenter ina fasa
d'infurmaziun e discussiun ha la Val Müstair votà il zercladur 2005
davart la varianta d'introducziun «pionier». Tut las sis vischnancas han
ditg gea.
- Meds d'instrucziun: La creaziun da meds d'instrucziun succeda
tenor cundiziuns da basa megliuradas. En la fasa da concept u
d'elavuraziun sa sanflan meds per la fasa «rg passiv», la fibla, ils
cudesch da lingua per la 2.-9. classa, ils meds da matematica per la
scola primara, pledaris per il stgalim mesaun e superiur.
- Furmaziun: En la Val Müstair ha gì lieu in emprim bloc da
furmaziun per la fasa «rg passiv»; en vista a la fasa «rg activ» è
vegnida creada ina gruppa d'experts che dirigia quest bloc principal da
la furmaziun.
Sgaurd enavant: Tge accents èn previs per il 2006?
- Cuntinuaziun da las lavurs lantschadas il 2005: Realisar meds
d'instrucziun e cuntinuar cun la furmaziun; tegnair ulteriuras
occurenzas d'infurmaziun e da discussiun davart l'introducziun dal
rumantsch grischun tenor la varianta «pionier».
- Preschentar in portal online cun il material existent en rumantsch
grischun. Ina part dals texts vegnan ad esser accessibels en furma
digitala e pon vegnir chargiads directamain sin l'agen computer e
squitschads per la lectura u per il diever en scola.
- Preschentar ils programs d'Office en rumantsch grischun (Word,
Excel, Outlook, PowerPoint) cun program da correctura integrà. Quests
instruments pon vegnir integrads gratuitamain en la versiun tudestga.
- Planisar ulteriuras mesiras che promovan l'adiever dal rumantsch
ed augmentan sia preschientscha sin ils pli differents champs
(furmaziun, meds da massa, cultura, administraziun).
Ulteriuras infurmaziuns:
www.rumantsch-grischun.ch
Gremi: Uffizi per la scola populara ed il sport
Funtauna: rg Uffizi per la scola populara ed il sport