La regenza grischuna beneventa da princip che l'ordinaziun davart la taxa sin il traffic pesant (OTTP) vegnia midada, sco che quai è previs da la confederaziun. En sia resposta da consultaziun a la confederaziun sustegna ella senza resalvas las mesiras per eliminar la distorsiun da concurrenza che vegn chaschunada d'interpresas da transport svizras che n'èn betg prontas da pajar questa taxa. La confederaziun ed ils chantuns perdan pervia da quai entradas da la taxa sin il traffic pesant dependenta da la prestaziun (TTPDP) da circa 10 milliuns francs per onn. La regenza n'è dentant betg perencletga cun il termin che vegn proponì per calcular da nov las parts da la TTPDP che vegnan pajadas oravant tut als chantuns cun territoris muntagnards e perifers. Tenor il dretg vertent vegn la clav da repartiziun per pajar ils circa 80 milliuns francs calculada da nov mintga dus onns. Tenor la confederaziun duai questa calculaziun vegnir fatga en il futur mintga diesch onns. En correspundenza cun la posiziun da la conferenza da las directuras e dals directurs chantunals da finanzas (CDF) propona la regenza da prolungar quest termin a tschintg onns.

La regenza prenda posiziun tar la lescha davart il transferiment dal traffic da rauba
En sia resposta da consultaziun a la confederaziun sustegna la regenza en general la posiziun cuminaivla da la conferenza da las regenzas dals chantuns alpins. Da princip spetgan las regiuns pertutgadas ed ils chantuns pertutgads en lur resposta a la confederaziun ch'i vegnia agì en moda pli speditiva e che las finamiras per transferir il traffic da rauba vegnian cuntanschidas uschè spert sco pussaivel. Las variantas che la confederaziun propona en quest connex na persvadan betg. En sia posiziun constatescha la regenza ultra da quai ch'ella refusa ch'ina basa legala per ina taxa sin il traffic da transit tras las Alps (TTA) vegnia stgaffida. Gist en il traffic svizzer chaschunass quai in spustament betg giavischà dal traffic da rauba da la viafier sin la via. Sche la TTA u sch'ina bursa per il transit tras las Alps vegniss eventualmain introducida, fissi necessari da stgaffir er mesiras accumpagnantas en las regiuns da las Alps, e quai oravant tut per il traffic svizzer, e d'introducir regulaziuns excepziunalas.

La regenza abolescha il scumond da pestgar durant ils firads
La regenza approvescha la revisiun da las prescripziuns da pestga. In'adattaziun impurtanta pertutga l'aboliziun dal scumond da pestgar durant ils firads. Tenor il dretg vertent èsi scumandà da pestgar en l'entir chantun durant il Venderdi sontg, durant la dumengia da Pasca, durant la dumengia da Tschuncaisma sco er durant la rogaziun federala. Cun excepziun da la rogaziun federala vegnan ussa abolids quests scumonds. Ulteriuras adattaziuns ch'èn vegnidas fatgas a chaschun da la revisiun pertutgan la stagiun da pestga, la fixaziun dals dis da schanetg, las mesiras minimalas dals peschs sco er las limitas dals peschs ch'ins po pigliar ed ils peschs d'estga. Las prescripziuns da pestga vertentas èn sa cumprovadas per gronda part. En il rom da questa revisiun èn pervia da quai mo vegnidas fatgas adattaziuns da disposiziuns ch'èn stadas stringentamain necessarias sco er materialmain giustifitgadas.

La participaziun vi da la ospitals da Cuira SA vegn vendida
La regenza venda la participaziun vi da la ospitals da Cuira SA a la fundaziun "ospital chantunal dal Grischun", e quai per 25'000 francs. Questa vendita è la consequenza da la nova organisaziun en il sectur dals ospitals. Ultra da quai motivescha la regenza la vendita cun il fatg che la participaziun dal chantun na saja betg pli necessaria per ademplir sias incumbensas en il sectur dals ospitals.

Da vischnancas e da regiuns
- Signuradi-Partenz: La regenza approvescha il plan per il svilup dal guaud (PSG) da la regiun Signuradi-Partenz. Quel regla l'utilisaziun futura dal guaud e fixescha las finamiras e las strategias da cultivaziun da la selvicultura a lunga vista per las regiuns dal Signuradi e dal Partenz.
- Claustra-Serneus/circul da Tavau: Per las lavurs da reparaziun suenter las malauras da l'onn 2005 approvescha la regenza ina contribuziun chantunala da 477'000 francs.
- Jenaz: Il plan da zonas 1:1'000 / 10'000 Spitzirain, Uf Platz, Alp Nova dals 15 da zercladur 2006 vegn approvà.
- St. Antönien/Ascharina: La dumonda da las suprastanzas communalas da St. Antönien e da St. Antönien-Ascharina da numnar la vischnanca fusiunada da nov "St. Antönien" vegn approvada da la regenza cun resalva dals resultats da la procedura da consultaziun entaifer l'administraziun federala.
- Trimmis: La revisiun parziala da la constituziun communala, concludida a chaschun da la radunanza communala dals 8 da zercladur 2006, vegn approvada da la regenza.
- Seewis: A la vischnanca da Seewis vegn garantida ina contribuziun da 69'000 francs als custs cun dretg da contribuziun per sanar las funtaunas Matan. En connex cun las malauras da l'onn 2005 era l'enchaschament da la funtauna da la vischnanca vegnì donnegià.
- Sursaissa: Il pais maximal permess sin la via da Sursaissa (dal spartavias Bellaua fin a S. Martin) vegn dauzà da 13 t sin 18 t durant l'entir onn.
- Sumvitg: Il pais maximal permess sin la via da Falens vegn dauzà da 18 t / 7 t sin 28 t.
- Solas-Mut: En il tunnel da la via da colliaziun da Solas a Mut vegn fixada la sveltezza maximala a 60 km/h.
- San Murezzan: En il vitg da San Murezzan vegn fixada la sveltezza maximala a 30 km/h sin la via Surpunt sco er sin la via Giovanni Segantini / via Salet ed i vegn introducida mintgamai ina "zona da tempo 30".

Contribuziuns chantunalas a differentas instituziuns
- Promoziun da l'integraziun: La regenza ha approvà totalmain 71'500 francs per projects per l'integraziun sociala da persunas estras che vivan en il chantun Grischun:
- Dopo scuola, cuminanza grischuna da lavur per l'assistenza da las lavurantas e dals lavurants esters, Cuira
- Agid d'integraziun per migrantas, centrala da dunnas, Cuira
- "SUPPORT" il program cumplessiv d'integraziun per migrantas e per migrants, Balikatan, Cuira
- Tudestg sco lingua estra, scola St. Catharina, Cazas
- La cuschina da mintgadi da tut il mund, inscunter internaziunal da dunnas, Domat
- Vegnir vegl en il Grischun, pro senectute dal Grischun, Cuira

Projects da vias
La regenza ha approvà 200'000 francs per construir e per sanar il suandant traject da via:
- via naziunala A 13: Soazza - San Bernardin sid

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun