Perquai che la situaziun economica è sa midada, è la preparaziun da la tscherna da professiun en las scolas daventada bler pli impurtanta. Cun differentas mesiras e cun differents products sustegna ed assista la cussegliaziun professiunala pervia da quai energicamain las stentas da las persunas d'instrucziun sin il stgalim superiur. Uschia vegnan meglieradas persistentamain las premissas da las scolaras e dals scolars che bandunan la scola, per ch'ellas ed els possian midar cun success vi en il mund professiunal. La stretga collavuraziun ch'è s'etablida dapi onns tranter la scola e la cussegliaziun professiunala s'exprima mintgamai il cumenzament dal nov onn da scola cun reparter l'agenda grischuna d'elecziun da professiun a tut las scolaras ed a tut ils scolars dal stgalim superiur. In product bainvis e da grond niz, che ha pudì vegnir edì er quest onn grazia al sponsoring generus da la banca chantunala grischuna.

Tge sa chatta en questa agenda?

Termins ed occurrenzas d'infurmaziun
Sco ch'il num exprima, consista il punct central da l'agenda d'ina preschentaziun cumplessiva d'occurrenzas impurtantas e d'occurrenzas d'infurmaziun. Latiers tutgan termins d'orientaziuns professiunalas, da tests da qualificaziun da manaschis e da federaziuns professiunalas, termins d'annunzia e datas d'examen da scolas da cuntinuaziun sco gimnasis, scolas medias commerzialas e professiunalas en il chantun Grischun.

Cussegliaziun professiunala/CIP en il Grischun
La cussegliaziun professiunala dal Grischun è dividida en trais regiuns geograficas. Tuttas trais han a disposiziun la medema purschida da basa. Uschia porscha mintga CIP (center d'infurmaziun professiunala) - independentamain da ses domicil - pussaivladads identicas da s'infurmar; latiers tutgan ordinaturs cun descripziuns da professiuns, revistas che pon vegnir emprestadas, broschuras sco er l'utilisaziun da l'internet per chargiar giu e per stampar infurmaziuns. En l'agenda sa chatta er ina glista pratica da las adressas da tut ils CIP e da tut ils posts da cussegliaziun cun ina survista da las cussegliadras professiunalas e dals cussegliaders professiunals ch'èn cumpetents per las singulas vischnancas.

Urari da la tscherna da professiun
Quel cumplettescha la part davart la cussegliaziun professiunala ed inditgescha, tge che capita cura, co e nua sin il viadi vers la professiun. El po vegnir cumpareglià cun in planisader da la ruta che mussa a la manischunza u al manischunz tge che vegn sco proxim. Tar quests termins centrals tutgan il cumenzament da la preparaziun per la tscherna da la professiun en scola, las orientaziuns da las classas en il CIP, occurrenzas d'infurmaziun davart professiuns e davart scolas, il cumenzament da la cussegliaziun persunala ed ils termins da fufragnadis. Davart quest tema ha la cussegliaziun professiunala dal Grischun er redigì in agen pitschen diari ch'ins survegn gratuitamain en tut ils CIP.

Tschertga da plazzas d'emprendissadi
Quai è in tema che ha ozendi ina impurtanza cleramain pli gronda che anc avant in pèr onns. La concurrenza è en general daventada pli dira, la tscherna d'emprendistas e d'emprendists correspundentamain pli pretensiusa. En quest connex dat l'agenda grischuna d'elecziun da professiun tips concrets che tanschan da la preparaziun premurusa d'ina annunzia fin al discurs da preschentaziun.

Professiuns en in'egliada
Plinavant cuntegna l'agenda grischuna d'elecziun da professiun ina preschentaziun detagliada e bain ordinada da champs professiunals cun lur professiuns da basa e secundaras sco per exempel da professiuns academicas che pretendan in studi universitar u in studi d'ina scola auta professiunala. In servetsch supplementar survegnan las scolaras ed ils scolars tras l'indicaziun da las professiuns da scolaziun che vegnan mintgamai purschidas en il chantun Grischun - ina survista actuala dal martgà per uschè dir.

In gudogn per tuttas e per tuts
Cun la consegna regulara da l'agenda grischuna d'elecziun da professiun èsi gartegià a la cussegliaziun professiunala dal Grischun da metter a disposiziun a tut las scolaras ed a tut ils scolars in instrument che als dat ina invista da las professiuns e che als sustegna en moda raschunaivla a tscherner ina professiun ed a tschertgar ina plazza d'emprendissadi.

Gremi: Uffizi per la furmaziun professiunala
Funtauna: rg Uffizi per la furmaziun professiunala