La regenza grischuna salida la formulaziun d'ina strategia communabla da la confederaziun, dals chantuns e da las vischnancas per il e-government. Questa strategia è vegnida stgaffida sut la direcziun da l'organ da strategia informatica da la confederaziun, integrond activamain las chancelieras ed ils chanceliers dals chantuns sco er las responsablas ed ils responsabels per il e-government tar la confederaziun, tar ils chantuns e tar las vischnancas. La finamira da la strategia per il e-government svizzer è da furmar - grazia al diever da la tecnica d'infurmaziun e da communicaziun - l'activitad administrativa per l'entira Svizra en moda uschè effizienta, economica e manaivla a la glieud sco pussaivel. Ella duai succeder en moda decentrala, dentant coordinada, e sut la surveglianza d'in gremi directiv e d'in secretariat ch'èn definids en ina cunvegna da basa davart la collavuraziun da la confederaziun e dals chantuns en connex cun il e-government.
La regenza giuditgescha las finamiras definidas ed ils princips fundamentals sco er l'organisaziun e la finanziaziun ch'èn vegnidas proponidas en las cunvegnas da basa sco emprims pass adequats per promover la collavuraziun dumandada. La strategia en connex cun il e-government saja ina buna premissa per la fasa da realisaziun che succeda ils onns 2007 fin 2010, scriva la regenza. Per il chantun saja impurtant ch'il e-government vegnia realisà cun success, per che la pussaivladad da reutilisar las prestaziuns sviluppadas saja garantida e per che las vischnancas sajan integradas en moda suffizienta.

Da vischnancas e da regiuns
- Roveredo: Il project da protecziun cunter crudada da crappa "Terra Bianca" da la vischnanca da Roveredo vegn approvà. Als custs cun dretg da subvenziun da 50'000 francs vegn garantida ina contribuziun chantunala da maximalmain 6'500 francs.
- Claustra-Serneus/Tavau: La regenza grischuna ha adattà la contribuziun chantunala per las lavurs da reparaziun da las malauras 2005 da la vischnanca da Claustra-Serneus e da Tavau a la contribuziun federala ed ha approvà en pli maximalmain 268'452.- fracs.
- S. Martin: A la vischnanca da S. Martin vegn garantida ina contribuziun da 49'000 francs als custs cun dretg da contribuziun per renovar e per engrondir il stabiliment dal provediment d'aua a Gadenstatt/Feistenberg.
- Panaduz: Als custs per construir ina plazza da transit per vagantas e per vagants da la Svizra en il territori da Nulez empè al lieu da fin ussa, ad Isla, vegn garantida a la vischnanca da Panaduz ina contribuziun maximala dad 80'000 francs.
- Igis: Il plan general d'avertura 1:2'000 traffic (revisiun da la colliaziun d'industria ost) dals 21 da matg 2006 vegn approvà.

Fatgs dal persunal
- René Schneckenburger, domicilià a Cuira, è vegnì nominà sco substitut dal manader da la secziun 2 tar la controlla da finanzas dal chantun Grischun.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun