Il "rapport grischun da famiglia" analisescha detagliadamain la
situaziun actuala da famiglias en il Grischun e definescha ils princips
e las finamiras che la regenza ha tar sia politica da famiglias.
Areguard las finanzas ha il cussegl grond, sa basond sin ils secturs
problemativs che la regenza identifitgà, gia realisà per gronda part las
mesiras ch'èn necessarias per meglierar la situaziun da las famiglias.
In basegn d'agir vesa la regenza oravant tut anc tar il meglierament da
la cumpatibilitad da la tgira d'uffants e da la professiun. Il rapport
da famiglia prevesa correspundentamain oravant tut mesiras en il sectur
da la scola. Il cussegl grond vegn probablamain a tractar il rapport
grischun da famiglia en la sessiun da favrer 2007.
Basa statistica
Il rapport da famiglia ch'è vegnì deliberà da la regenza è vegnì
pretendì d'in postulat dal cussegl grond l'onn 2002. Il rapport che
cumpiglia 84 paginas analisescha en ina emprima part la situaziun
actuala da la politica da famiglia en il chantun. Dapi l'onn 2000 è il
dumber da naschientscha sa reducì per circa in quart da 2011 a 1528
naschientschas. La quota da naschientscha en il Grischun è cun 1.2
uffants per dunna la pli bassa da tut la Svizra. Il dumber da chasadas
da famiglia en il Grischun importa circa 48'000 da totalmain 78'000
chasadas privatas (dumbraziun dal pievel 2000). Il dumber da las
maridaglias è regressiv dapi l'onn 1990. Perencunter s'augmenta la quota
da divorzis. L'onn 2005 èn vegnidas concludidas 805 lètgs e 424 lètgs èn
vegnidas separadas. Il dumber da las persunas ch'educheschan sulettas è
creschì en il Grischun da l'onn 1970 a l'onn 2000 per circa 1'000
chasadas a 3'760.
Basegn d'agir per la politica
Sin basa da questa analisa preschenta la regenza en la segunda part
dal rapport ils secturs problematics ch'èn ils pli impurtants or da ses
puntg da vista. In basegn d'agir per la politica è avant maun en ils
secturs da la tgira d'uffants cumplementara a la famiglia, da la scola,
da l'activitad da gudogn, da las finanzas e da la cussegliaziun. Ina
influenza considerabla per las midadas famigliaras ha l'enclegientscha
da la rolla da la dunna ch'è sa midada pervia da las meglras premissas
da furmaziun e pervia da la dumonda da l'economia da forzas da lavur.
Ils princips e las finamiras che la regenza ha formulà per sia politica
da famiglias pretendan ch'il chantun e che las vischnancas promovian il
bainstar e la segirezza sociala da la famiglia. Il maun public duai
stgaffir relaziuns da basa favuraivlas per famiglias e resguardar tut
las furmas da famiglias.
Finamiras da la politica da famiglia
En il rapport vegnan fixadas trais finamiras concretas da la
politica da famiglia: Ina mira centrala è quella da meglierar la
cumpatibilitad da la famiglia cun la professiun. Quella dependa en moda
decisiva da las purschidas per ina tgira d'uffants cumplementara a la
famiglia, da l'organisaziun da l'instrucziun en scola sco er da las
structuras da la lavur. Sco segund punct duai la segirezza finanziala da
la famiglia vegnir garantida tras prestaziuns da transfer (reducziun
individuala da las premias, supplements da famiglia, stipendis, agid
social e.u.v.) e cun pussaivladads da deducziuns tar las taglias, e quai
integrond l'atgna responsabladad. Sco terz punct duai finalmain la
purschida da cussegliaziun per famiglias vegnir mantegnida ed adattada
en tscherts puncts. La regenza punctuescha en quest connex che la
purschida ch'exista en il chantun haja in bun standard. Cun il sustegn
finanzial da questas purschidas duai vegnir cuntinuà, e quai tenor
basegn.
Mesiras da la politica da famiglia
Da las finamiras deducescha il rapport ina glista d'almain 25
mesiras concretas che duain meglierar la situaziun da las famiglias. La
plipart da las mesiras en il sectur da la famiglia e da las finanzas è
en il fratemp gia vegnida realisada per gronda part.
Areguar las prioritads che ston vegnir tschentadas en connex cun las
mesiras che n'èn anc betg eralisadas ha la regenza mess la paisa
centrala sin mesiras che megliereschan la cumpatibilitad da la famiglia
cun la professiun. Tenor l'avis da la regenza datti las mancanzas las
pli grondas areguard la cumpatibilitad da la famiglia cun la professiun
en il sectur da la scola. L'introducziun d'uras da bloc e da maisas da
mezdi en la scolina ed en la scola populara en tut il chantun sco er
l'assistenza dals uffants durant las uras marginalas avant e suenter las
uras da bloc duain garantir in'assistenza dals uffants durant l'entir
di. Ultra da quai duai in rinforzament dal sustegn finanzial en il
sectur da la tgira d'uffants cumplementara a la famiglia meglierar
considerablamain la cumpatibilitad da la famiglia cun la professiun. Las
mesiras ch'èn previsas per garantir in'assistenza dals uffants durant
l'entir di en la scolina ed en la scola populara chaschunan custs
supplementars per il chantun e per las vischnancas che vegnan stimads a
6.5 milliuns francs, quellas en il sectur da la tgira d'uffants
cumplementara a la famiglia da circa 0.4 milliuns francs.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun