En ina nova exposiziun speziala sa deditgescha il museum retic a Cuira al tema da la puntera e cunzunt al viadi da dus gimnasiasts cun ina puntera sin il Rain. L'exposiziun "ZATTERA GR 1 – in viadi cun ina puntera sin il Rain" dura dals 28 da mars fin ils 23 d'avrigl 2006.

Dino De-Stefani (19) e Giuliano Krättli (20) han dà giu ina lavur da maturitad dal tuttafatg speziala. Cun lur puntera ch'els han construì sezs han els fatg la stad 2005 in viadi sin il Rain fin in pau pli lunsch che Strassburg. Lur aventura da trais emnas han els documentà cun in film d'ina mesa ura. En la nova exposiziun speziala mussa il museum retic il film, la puntera originala ed ulteriurs documents actuals ed istorics davart la flottaziun.
Fin lunsch en il 19avel tschientaner è vegnì flottà en il Grischun, per exempel sin il Rain unì a partir da La Punt. Per l'ina han las punteras transportà rauba da tut gener giu dal Rain, per l'autra ha lur laina chattà bleras interessents e blers interessents a la riva dal lai da Constanza. Krättli e De-Stefani han cumenzà cun lur viadi pir suenter la cascada dal Rain. Perencunter han els fatg passa 300 kilometers. Fin tar la Mar dal nord n'èn els dentant betg arrivads, els han dentant rimnà ina massa impressiuns e passentà diversas aventuras. Lur puntera è schizunt vegnida renconuschida d'uffizi, preschentada a l'uffizi per il traffic sin via ed immatriculada sco GR 1.
L'exposiziun dura dals 28 da mars fin ils 23 d'avrigl 2006. La vernissascha ha lieu ils 27 da mars a las 18.30.
Uras d'avertura: mardi – dumengia: da las 10.00 – 12.00 e da las 14.00 – 17.00, a partir dal 1. d'avrigl da las 10.00 – 17.00.
Glindesdi serrà. Entrada: 6.– / 4.– / 0.– francs

Gremi: museum retic
Funtauna: rg museum retic