L'interfatscha d'utilisader rumantscha per Microsoft Office, annunziada il favrer 2005, è ussa disponibla. A chaschun d'ina orientaziun da las medias a Cuira han il chantun Grischun, la Lia Rumantscha e Microsoft preschentà oz il pachet «Office Rumantsch».

La versiun rumantscha da la suita da biro la pli derasada sin l'entir mund cuntegna ina interfatscha d'utilisader rumantscha a basa da la lingua uffiziala rumantsch grischun sco era in program da correctura ortografica per Microsoft Office 2003. Ella è vegnida realisada a basa d'in contract da partenadi public-privat suttascrit il favrer 2005 da Microsoft Svizra e dal chantun Grischun. Oz han las persunas responsablas dal project preschentà l'Office Rumantsch a la publicitad.
Claudio Lardi, schef dal departament d'educaziun, cultura e protecziun da l'ambient dal chantun Grischun, ha ditg: «Oz terminain nus in project pretensius e faschain a medem temp in pass impurtant per rinforzar vinavant il rumantsch en il mintgadi. Jau sun persvadì che l'Office Rumantsch vegn a contribuir fermamain al mantegniment da nossa quarta lingua naziunala, perquai ch'el vegn duvrà en las scolas, en ils manaschis ed a chasa.»
Peter Waser, il manager general da Microsoft Svizra, ha constatà: «L'adattaziun rumantscha da las applicaziuns dad Office è succedida en il rom da noss Local Language Program. Nus ans legrain fitg che la collavuraziun cun il chantun Grischun e cun la Lia Rumantscha è reussida uschè bain. Ussa sperain nus da pudair porscher a la populaziun rumantscha cun il pachet «Office Rumantsch» in instrument da lavur nizzaivel ed efficazi.»
La finamira dal Local Language Program da Microsoft è da metter a disposiziun products da Microsoft era en linguas main derasadas. Uschia vul Microsoft porscher era a las cuminanzas linguisticas e culturalas pli pitschnas in access liber e direct al mund dals meds d'infurmaziun moderns e gidar ellas a rinforzar lur lingua e cultura en la vita da mintgadi.

Passa 2000 novs terms da la IT per il rumantsch
La responsabladad per la part linguistica da l'adattaziun ha il chantun Grischun surdà a la Lia Rumantscha (LR). La linguista ed ils linguists da la LR han gì da dar dumogn a differentas sfidas: en il decurs da las lavurs da translaziun han els stuì crear u fixar passa 2000 terms da la tecnologia d'infurmaziun, per ils quals n'existiva anc nagina expressiun en rumantsch.
Il glossari è publitgà sin la pagina d'internet: http://members.microsoft.com/wincg/home.aspx?langid=1047.
Cunquai ch'igl era previs da metter a disposiziun era in program da correctura ortografica sco part impurtanta surtut per l'applicaziun en scola, ha la LR ultra da quai elavurà in lexicon electronic cumplessiv che resguarda era ils aspects grammaticals essenzials da la furmaziun da pleds.

Il pachet è disponibel gratuitamain en l'Internet
Suenter che las lavurs lexicalas èn stadas terminadas, ha Microsoft pudì prender per mauns la realisaziun tecnica en l'uschenumnà Language Interface Pack (LIP). Il LIP per la versiun rumantscha è disponibel a partir dad ussa gratuitamain en l'internet e po vegnir chargià giu da l'adressa: http://www.microsoft.com/downloads/details.aspx?FamilyId=CCF199BC-C CC987-48 F5-9707-DC6C7D0E35D0%26displaylang=rm

In instrument da lavur effizient
Cun l'adattaziun da las applicaziuns dad Office e cun il program da correctura dispona la cuminanza rumantscha ussa d'in instrument da lavur effizient per il computer. Il program da correctura simplifitgescha e sustegna surtut la transposiziun dals idioms en la lingua da standard rumantsch grischun cun render attent als princips ortografics dal rumantsch grischun. El è uschia in instrument da lavur fitg nizzaivel e pratic surtut per la magistraglia, per persunas en scolaziun, per uffizis, per collavuraturAs da las medias e per translaturAs. Era per las utilisadras e per ils utilisaders a chasa pudess l'Office Rumantsch daventar spert in instrument da lavur util per duvrar il rumantsch a moda natirala al computer ed en l'internet.

Microsoft Svizra s'engascha vinavant per ils territoris da muntogna
L'integraziun dal rumantsch en il Microsoft Local Language Program stat en il context pli vast da l'engaschament da Microsoft Svizra per ils territoris da muntogna. Dapi il 2003 promova Microsoft ensemen cun la gruppa svizra per las regiuns da muntogna (SAB) l'utilisaziun da tecnologias d'infurmaziun en ils territoris da muntogna svizzers. La collavuraziun cun la SAB è vegnida iniziada il 2003 ed è vegnida prolungada avant paucs dis per dus ulteriurs onns. La finamira è da garantir ch'ils projects locals currents en Surselva ed en l'Obersimmental possian vegnir cuntinuads ed amplifitgads a media vista tras in'ulteriura regiun d'accent.

Gremi: departament d'educaziun, cultura e protecziun da l'ambient
Funtauna: rg uffizi da cultura