Il chantun Grischun duai sa participar a la surveglianza da la lescha federala davart la prevenziun professiunala per vegliadetgna, survivents ed invaliditad (LPP) e da las fundaziuns da la Svizra orientala. Per mauns dal cussegl grond ha la regenza approvà latiers la missiva per l'approvaziun da la cunvegna interchantunala davart la participaziun dal chantun Grischun a la surveglianza da la LPP e da las fundaziuns da la Svizra orientala. Quel vegn a tractar la fatschenta en la sessiun d'avust.
La surveglianza da las instituziuns da prevenziun professiunala duai vegnir transferida ad ina instituziun da dretg public dals chantuns da la Svizra orientala. Tar ils chantuns da cunvegna tutgan Glaruna, Appenzell dador, Appenzell dadens, Son Gagl, Grischun e Turgovia. En la surveglianza cumminaivla da la LPP e da las fundaziuns da la Svizra orientala cun sedia a Son Gagl sa laschan concentrar optimalmain las enconuschientschas professiunalas fermamain spezialisadas da l'economia da manaschi, da la giurisdicziun e da la prevenziun. La finamira è da professiunalisar dapli la surveglianza da las instituziuns da prevenziun. Uschia vegnan observadas las pretensiuns che s'augmentan tar l'activitad da surveglianza, tge che maina la finala ad ina ristga da responsabladad pli pitschna. Ils custs da l'activitad da surveglianza vegnan cumpensads tras taxas che cuvran ils custs, sco che quai era gia fin ussa il cas en ils blers chantuns participads.
Ils chantuns pon plinavant er transferir a l'instituziun la surveglianza da las fundaziuns classicas. Ils chantuns Son Gagl, Turgovia e Glaruna fan diever da quai. La regenza grischuna è s'exprimida davent dal cumenzament da tegnair en il chantun la surveglianza da las fundaziuns classicas pervia da las cundiziuns localas, regiunalas u chantunalas.
En ils chantuns participads da la Svizra orientala vegnan survegliadas totalmain 890 instituziuns da prevenziun cun ina facultad da circa 33 milliardas francs sco er 1172 ulteriuras fundaziuns classicas cun in chapital da 2,8 milliardas francs. En il Grischun èn quai 110 instituziuns da la prevenziun professiunala cun ina facultad totala da 3,3 milliardas francs che fissan da nov suttamessas a la surveglianza da la LPP da la Svizra orientala. Dal reminent datti en il Grischun circa 300 fundaziuns classicas cun in volumen dad 1 milliarda francs che vegnan vinavant survegliadas dal chantun.
La participaziun pretenda ina revisiun parziala da la lescha introductiva tar il cudesch civil svizzer. La lescha chantunala davart la prevenziun professiunala po vegnir abolida. Premess ch'ils parlaments sco er eventualmain las votantas ed ils votants dals chantuns da cunvegna approveschan la cunvegna interchantunala, èsi previs che la surveglianza da la LPP e da las fundaziuns da la Svizra orientala cumenza cun sia activitad commerziala il 1. da schaner 2008.

La regenza deliberescha la missiva tar la nova lescha davart las stimaziuns uffizialas
L'ordinaziun da stimaziun existenta dal chantun Grischun duai vegnir transferida en ina nova lescha. La regenza grischuna ha deliberà la missiva correspundenta per mauns dal cussegl grond. La nova lescha che regla la realisaziun da stimaziuns uffizialas en il chantun Grischun vegn tractada dal cussegl grond en la sessiun d'avust.
L'impuls per la revisiun en il sectur dals fatgs da stimaziun è la nova constituziun chantunala che fixescha che tut las disposiziuns impurtantas stoppian vegnir relaschadas dal cussegl grond en furma d'ina lescha. En il dretg da stimaziun vertent èn regladas disposiziuns essenzialas sco l'organisaziun da l'uffizi da stimaziun, ils ojects che ston vegnir stimads u er il rom dal sistem da las taxas sin in stgalim da relasch pli bass en ina ordinaziun da stimaziun dal cussegl grond respectivamain en ils relaschs executivs da la regenza. L'elavuraziun prevesa perquai en emprima lingia d'integrar las disposiziuns las pli impurtantas en ina lescha formala. En quai che reguarda il cuntegn ha la basa legala vertenta ch'è sa cumprovada en la pratica pudì vegnir surpigliada per gronda part. Ultra da las diversas adattaziuns formalas e simplificaziuns n'haja pia strusch dà midadas materialas.
Il sboz da la lescha qua avant maun pussibilitescha ultra da quai da concentrar il dretg chantunal da stimaziun da quatter a mo anc dus relaschs. Da nov duain tut las disposiziuns necessarias vegnir fixadas en ina lescha davart las stimaziuns uffizialas sco er en in'ordinaziun da la regenza davart las stimaziuns uffizialas. Cun questa reducziun dals relaschs èsi pussaivel da preschentar meglier ed en moda pli survesaivla la legislaziun chantunala davart ils fatgs da stimaziun. Entant ch'ils relaschs vertents cuntegnevan ca. 90 artitgels, cuntegnan ils novs relaschs mo pli circa in terz da quai.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun