A chaschun da l'emprima conferenza d'avegnir davart il svilup coordinà dal territori dal Gottard han circa 80 persunas da la politica, da l'economia e da la societad discutà en il plenum ed en differentas gruppas da lavur intensivamain davart lur visiuns e davart lur projects ed han fixà cuminaivlamain ils proxims pass.br>
Cun quest project davart il svilup dal territori dal Gottard, PREGO, vulan ils quatter chantuns dal Gottard Uri, Vallais, Tessin e Grischun dar la direcziun al svilup territorial, economic e turistic dal territori dal Gottard. Fin la mesadad da l'onn 2011 duai vegnir stabilì in process che vegn purtà cuminaivlamain da tuts e duain vegnir realisads ils projects che concretiseschan la basa e las ideas sco ch'ellas èn fixadas en il concept dal territori per il Gottard da l'avust 2005. En in emprim pass vegnan stabilidas novas furmas da la collavuraziun tranter acturas ed acturs da la politica, da l'administraziun e da l'economia privata e sviluppads ensemen projects e concepts transcunfinals. La mesadad da l'onn 2007 vegn il cussegl federal infurmà davart il stadi da quest process.

Stabilir la collavuraziun
In'emprima conferenza en quest connex ha gì lieu ils 5 da fanadur 2006 sin il pass dal Gottard. Cusseglieras e cussegliers guvernativs da quatter chantuns sco er acturas ed acturs impurtants da l'economia, da la planisaziun e da la politica han preschentà, mess en discussiun e concentrà per in futur cuminaivel lur ideas e lur projects concernent il territori dal futur dal Gottard. L'avantmezdi han skizzà ils cussegliers guvernativs Isidor Baumann (Uri), Marco Borradori (Tessin), Jean-Michel Cina (Vallais) e Stefan Engler (Grischun) ils potenzials da quest territori, infurmà davart las intenziuns dals chantuns ed er renvià a la situaziun economica ch'è per part difficila. La perdita da plazzas da lavur, la reducziun dal provediment da basa, la valur agiuntada ch'è sut la media, l'emigraziun dals umans giuvens, il basegn d'investiziun dals hotels existents caracteriseschan la gronda part da las regiuns parzialas dal territori dal Gottard. La forza innovativa da la regiun che sa mussa en spezial en projects decisivs en il sectur dal turissem sco per exempel en cas dal glacier-express è vegnida punctuada.
Represchentantas e represchentants da l'economia han preschentà e discutà purschidas turisticas existentas e progressivas u projects concrets sco sasso San Gottardo, ils munds d'aua da Göschenen, il museo nazionale San Gottardo u Andermatt tourismus resort. Fixads èn vegnids la basa necessaria ed ils facturs dal success decisivs - la concentraziun da purschidas turisticas sut la marca da tetg "Gotthard - San Gottardo" stat qua en il center.

Marca da tetg "Gotthard - San Gottardo" sco factur da success
Il suentermezdi èn vegnids discutads temas sco "il svilup economic", "process communals e regiunals" sco er" infrastructuras publicas e cuntanschibladad" en il territori dal Gottard en gruppas da lavur, en las qualas las circa 80 participantas e participants da la conferenza han pudì manifestar lur atgnas ideas e lur agens basegns.
En il sectur tematic "svilup economic" han las participantas ed ils participants mess ils accents sin la creaziun da cundiziuns da basa favuraivlas per projects privats sco la concentraziun da purschidas en il turissem u sco cuminanzas transcunfinalas da telefericas e.u.v. Cun "process communals e regiunals" en il senn dad "agendas localas 21" vulan las singulas acturas ed ils singuls acturs vesair francada lur iniziativa sin plaun local, purtada da la populaziun e garantida en moda persistenta. Oravant tut la collavuraziun surcommunala ed il svilup da models directivs locals e regiunals che gidan e metter accents tar il svilup da las vischnancas e che dattan impuls per il svilup dals abitadis vegnan resguardads sco essenzials. La gruppa da lavur "infrastructura publica e cuntanschibladad" vul colliaziuns da traffic attractivas sco cumplettaziun raschunaivla da las purschidas turisticas en il territori dal Gottard, per exempel in viadi tras il tunnel da basa dal Gottard via la Porta Alpina a Sedrun, cun il glacier express vinavant ad Andermatt per returnar puspè en la Svizra bassa tras la chavorgia da Scalina e sur il traject da muntogna dal Gottard - che vegn alura a far part dal patrimoni mundial da la UNESCO, e quai betg en in di, mabain sco pussaivladad d'arriv e da return en cas da segiurns da plirs dis en la regiun dal Gottard.

Gremi: departament da construcziun, traffic e selvicultura dal Grischun
Funtauna: rg departament da construcziun, traffic e selvicultura dal Grischun