Paucs projects impurtants empè da blers projects pitschens
En il center da la conferenza da las scheffas e dals schefs da las
regenzas da la cuminanza da lavur da las regiuns alpinas (ARGE ALP) da
quest onn stat la deliberaziun da trais resoluziuns sco er da quatter
projects novs. L'accent da la lavur vegn mess - suenter la refurma da la
ARGE ALP - sin paucs projects impurtants empè da sin blers projects
pitschens. L'inscunter da las scheffas e dals schefs da las regenzas sut
il presidi da la provinza autonoma da Trento ha lieu venderdi, ils 23 da
zercladur 2006, a Revò.
A la conferenza da las scheffas e dals schefs da las regenzas da la
ARGE ALP da l'onn passà han ils stadis commembers concludì ina refurma
cumplessiva. La finamira da la nova concepziun da la ARGE ALP è
d'orientar la lavur puspè dapli a temas politics. L'accent da la lavur
duai vegnir mess en il futur, empè da sin blers projects pitschens, sin
paucs projects impurtants. A la conferenza da las scheffas e dals schefs
da las regenzas da quest onn duain vegnir deliberads trais resoluziuns e
quatter projects novs.
Trais resoluziuns stattan en discussiun
L'emprima resoluziun sa referescha al "Cudesch verd da la UE: Ina
strategia europeica per in'energia segira, cumpetitiva e durabla". La
ARGE ALP pretenda tranter auter che er l'amplificaziun da la forza
idraulica vegnia fixada sco opziun impurtanta en il cudesch verd tar las
energias regenerablas.
La segunda resoluziun pertutga la "Directiva relativa a la taxaziun
da vehichels utilitars grevs per il transport sin tschertas vias da
traffic - directiva da la UE davart ils custs d'infrastructura". Ils
stadis commembers da la ARGE ALP pretendan ch'i vegnia fatg vinavant
sforzs sin plaun europeic - e quai cun insistenza - per cumpigliar pass
a pass er ils custs externs dal traffic. Concretamain sa tracti
d'integrar en la nova directiva da la UE davart ils custs
d'infrastructura tut ils custs externs che vegnan chaschunads dal
traffic, sco per exempel ils custs ecologics, da canera, da stagnaziun e
da sanadad. Plinavant è la ARGE ALP da l'avis che la finanziaziun
traversala d'infrastructuras alternativas dastgia vegnir duvrada er per
vias da traffic en regiuns da muntogna sensiblas, en las qualas vegn
cumprovà in basegn d'amplificaziun urgent.
A las prestaziuns da servetsch en l'artg alpin sa referescha la
terza resoluziun che stat en discussiun. La ARGE ALP envida la UE ed ils
stadis naziunals da mantegnair il provediment da basa en l'artg alpin.
Ella pretenda tranter auter che la rolla speziala dal sectur public
vegnia renconuschida il mument che las prestaziuns da servetsch vegnan
organisadas, e quai resguardond las particularitads geograficas,
culturalas ed economicas dals territoris da muntogna.
Quatter projects novs èn vegnids inoltrads
Per mauns da la conferenza da las regenzas ha la cumissiun da
direcziun da la ARGE ALP inoltrà quatter projects novs. Il project
"L'ensemen da las generaziuns" ha la finamira da cumparegliar las
differentas strategias e las differentas tenutas, cun las qualas las
regiuns da l'artg alpin respundan a las sfidas da la midada demografica.
Il project ch'è vegnì inoltrà dal Vorarlberg quinta cun custs d'in
import da 15'000 fin 20'000 euros.
In ulteriur project inoltrà dal Vorarlberg ha la finamira da
constituir ina rait da geodatas per ils stadis commembers da la ARGE
ALP. La rait da geodatas planisada duai daventar ina da las basas per
diriger las acziuns en cas da catastrofas e duai facilitar las lavurs da
salvament transcunfinalas. Ils custs muntan annualmain a 30'000 euros.
Dus projects dal Grischun
Il Grischun ha lantschà gist dus projects: Sut il titel "Zonas cun
pauc potenzial" vul il project cuntanscher in barat d'experientschas
internaziunal en il sectur dal svilup regiunal e dal tractament da
potenzials betg utilisads. Per quest intent duai vegnir elavurà in studi
da cumparegliaziun che valitescha differentas strategias da svilup a
maun da l'exempel da vals u da regiuns cun problems da svilup
particulars. Ad ina dieta da spezialistas e da spezialists duain vegnir
barattadas las experientschas ed ils resultats. Il project cun ina
durada da dus onns quinta cun custs da 35'000 euros per onn.
Da sport e da gieu sa tracti tar il segund project ch'è vegnì
inoltrà dal Grischun. "Gieus ARGE ALP 06/07" vul promover il barat activ
en il sport. En total duain avair lieu otg concurrenzas da sport
decentralmain en ils differents stadis commembers, e quai en furma da
gieus d'enviern, da gieus da stad e da gieus per persunas impedidas. Ils
custs per coordinar e per communitgar las differentas occurrenzas, per
publitgar las concurrenzas e per organisar ils premis muntan a 20'000
euros.
Il presidi va al Vorarlberg
Il preventiv 2007 da la ARGE ALP prevesa expensas totalas da 400'000
euros. La 37avla conferenza da las scheffas e dals schefs da las
regenzas da la ARGE ALP che ha lieu venderdi, ils 23 da zercladur 2006,
a Revò, stat sut il presidi da la provinza autonoma da Trento. Spetgadas
e spetgads vegnan represchentantas e represchentants dals suandants
diesch stadis, da las suandantas provinzas e dals suandants chantuns:
Baviera, Bulsaun-Tirol dal sid, Grischun, Lumbardia, Salzburg, Son Gagl,
Tessin, Tirol, Trentino e Vorarlberg. Il presidi da la ARGE ALP durant
l'onn 2007 surpiglia da nov il Vorarlberg.
Gremi: regenza
Funtauna: rg chanzlia chantunala dal Grischun