La cumissiun da gestiun dal cussegl grond (CdG) e la regenza grischuna vulan concretisar la posiziun da la controlla da finanzas sin il stgalim da la lescha e rinforzar l'independenza da la controlla da finanzas. Plinavant duain vegnir scleridas las dependenzas en il sectur administrativ. En quest connex duai vegnir resguardà er il svilup da las controllas da finanzas en il rest da la Svizra. La regenza ha deliberà la missiva correspundenta per ina nova lescha davart las finanzas e davart la surveglianza da finanzas en il chantun Grischun. Il cussegl grond vegn a tractar la fatschenta en la sessiun d'avust 2007. Ils relaschs revedids duain per gronda part vegnir mess en vigur il 1. da schaner 2008.
La nova regulaziun da la surveglianza da finanzas sa basa fitg sin la lescha da model da l'uniun professiunala da las controllas da finanzas da la Svizra. En cumparegliaziun cun la regulaziun actuala vegn rinforzada l'independenza da la controlla da finanzas, quai ch'è da gronda impurtanza per sia activitad da controlla e per sia credibladad. La controlla da finanzas duai dentant - sco quai ch'igl è usità en Svizra - esser activa vinavant sco organ spezialisà da la surveglianza da finanzas per la CdG e per la regenza. Il sectur da surveglianza vegn perquai definì en moda fitg cumplessiva. Uschia vegnan realisads er ils giavischs da la constituziun dal chantun Grischun. Tar ils instituts autonoms da dretg public sa restrenscha la surveglianza da la controlla da finanzas - senza ina incumbensa speziala tras la regenza u tras la CdG - sin in rapport da gestiun, sin il quint annual e sin il rapport da revisiun.
Ina da las novaziuns da la revisiun prevesa che la regenza duai eleger la manadra u il manader da la controlla da finanzas sin proposta d'in gremi da selecziun paritetic che consista da represchentantas e da represchentants da la regenza e da la CdG. Areguard las cumpetenzas d'expensas ed areguard ils surpassaments da credits duai la controlla da finanzas plinavant survegnir il medem status sco in departament. La controlla da finanzas fa ses preventiv che vegn surpiglià da la regenza senza midadas en il sboz per il preventiv dal chantun. Ella suttametta dumondas per surpassaments da credits e per credits posteriurs directamain a la cumissiun da gestiun. En il rom dal preventiv ch'è vegnì approvà è la manadra u il manader da la controlla da finanzas cumpetent per tut las fatschentas da persunal da la controlla da finanzas, en spezial er per engaschaments, per promoziuns e per relaschadas.
La cumissiun da gestiun incumbensescha in post da revisiun extern d'examinar il quint da la controlla da finanzas sco er il giudicament periodic da la qualitad e da las prestaziuns. Ultra da quai duai la controlla da finanzas sustegnair l'activitad da surveglianza da la CdG, e quai resguardond l'incarica da questa cumissiun. La controlla da finanzas dat tut las infurmaziuns che servan a la surveglianza suprema da la CdG . Da nov duai il secretariat da la CdG vegnir separà cleramain da la controlla da finanzas e vegnir integrà en il secretariat dal cussegl grond. La finala duai il rapport da gestiun da la controlla da finanzas da nov vegnir pulbitgà dal tuttafatg u per part er per il cussegl grond. Quest rapport sto dentant tegnair quint dal secret d'uffizi e dals dretgs da la persunalitad.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun