Sin l'areal da la scola chantunala grischuna a Cuira - tranter
l'areal a la Plessur e l'areal a la Halde - duai vegnir construida ina
colliaziun che correspunda als basegns da las persunas cun impediments.
En sia missiva al cussegl grond preferescha la regenza en quest connex
ina varianta cun in ascensur inclinà e cun stgalas che sutpassan la via
da S. Luzi. Il cussegl grond vegn a tractar questa fatschenta durant la
sessiun da december.
En la sessiun da zercladur 2006 aveva il cussegl grond concludì da
sanar la scola chantunala a la Halde a Cuira ed aveva concedì in credit
da 50 milliuns francs per quest intent. En il fratemp han cumenzà las
lavurs da sanaziun. A medem temp ha il cussegl grond incumbensà la
regenza d'elavurar in project separà per colliar ils lieus da scola a la
Plessur ed a la Halde confurm als basegns da las persunas cun
impediments.
Ils dus lieus principals da la scola chantunala grischuna èn
colliads oz unicamain sur la via stretga da S. Luzi ch'è a medem temp la
via d'autos per ir ad Arosa. Questa via cuntegna privels per las
scolaras e per ils scolars, ella dovra bler temp ed umans cun
impediments d'ir a pe n'èn praticamain betg abels da superar
independentamain quest traject. Mintga di, durant las sis fin otg pausas
da l'instrucziun, ston 20 fin 30 classas dischlocar davent da l'areal a
la Halde fin tar l'areal a la Plessur resp. fin tar las hallas da sport
al Sand e viceversa.
Sco soluziun per ina colliaziun recumonda la regenza - suenter avair
considerà tut ils avantatgs e tut ils dischavantatgs - in ascensur
inclinà sco er stgalas ch'èn integrads en la costa, che sutpassan la via
da S. Luzi e che surmuntan alura la differenza d'autezza da var 30
meters per lung dal mir dal santeri da S. Luzi fin a la scola chantunala
a la Halde. Tar questa varianta vegnan resguardads cumplainamain ils
basegns da las persunas cun impediments. Areguard il maletg da la citad
vegn stgaffida in'ovra da construcziun ch'è integrada bain e ch'è
plitost discreta.
Ils custs d'investiziun vegnan calculads cun 5.8 milliuns francs.
Igl è planisà da cumenzar l'avrigl 2009 cun las lavurs da construcziun.
La nova colliaziun duai pudair vegnir averta il pli tard la stad 2010,
cur che la sanaziun da la scola chantunala a la Halde è finida.
Gremi: regenza
Funtauna: rg chanzlia chantunala dal Grischun