En il Rain alpin cumenza la pestga gia il 1. da favrer. Da nov na
dastgan las pestgadras ed ils pestgaders grischuns ultra da quai betg mo
pestgar en il Rain alpin sut la punt da Tardis, mabain sin tut sia
lunghezza fin tar centrala da las ovras electricas a La Punt. Las novas
prescripziuns da pestga cuntegnan ultra da quai ina schluccada dal temp,
durant il qual i dastga vegnir pestgà, sco er la realisaziun da la nova
strategia per metter en libertad la litgiva giaglia.
Las novas prescripziuns da pestga ch'èn vegnidas relaschadas da la
regenza grischuna ils 31 d'october 2006 entran en vigur il 1. da favrer
2007 cun l'avertura da la pestga en il Rain alpin. Per il Rain alpin po
vegnir communitgada la novaziun la pli impurtanta. A partir dal 1. da
favrer na dastgan las pestgadras ed ils pestgaders ussa betg mo pestgar
en il Rain alpin sut la punt da Tardis, mabain sin tut la lunghezza fin
tar la centrala da las ovras electricas a La Punt. Restricziuns localas
datti mo durant il temp da cuar dal rivaun cumin (actitis hypoleucos) e
dal gravarel pitschen (charadrius dubius). En la gronda part da las auas
dal Grischun cumenza la pestga sco enfin ussa il 1. da matg.
Ultra da questas novaziuns per il Rain alpin cuntegnan las novas
prescripziuns er schluccadas dal temp, durant il qual i dastga vegnir
pestgà. Da nov èsi mo pli scumandà da pestgar durant la rogaziun
federala.
Per di dastgan vegnir tschiffadas mo pli maximalmain 4 litschalas en
auas currentas. Da nov vegn chastià cun ina multa disciplinara, tgi che
na tracta ils peschs tschiffads betg en na moda ch'è adattada a quest
animal.
Las amias ed ils amis da la pestga pon sa legrar il pli fitg che la
litgiva giaglia po puspè vegnir messa en libertad en tscherts lais. Per
las pestgadras e per ils pestgaders è quai in augment da l'attractivitad
e per tschertas auas currentas, nua ch'i vegn pestgà en moda fitg
intensiva, è quai speranza ina distgargia.
Avant che la generaziun giuvna da pestgadras e da pestgaders ed
avant che las novas pestgadras ed ils novs pestgaders pon ir a pestgar,
sto vegnir absolvida la scolaziun obligatorica. Davart l'organisaziun da
quests curs infurmescha la pagina d'internet da l'uffizi da chatscha e
pestga (www.jagd-fischerei.gr.ch).
Gremi: uffizi da chatscha e pestga
Funtauna: rg uffizi da chatscha e pestga