En connex cun il project da transport sutterran d'electricitad Greenconnector ha ina gruppa da contact ch'è vegnida nominada dal departament da construcziun, traffic e selvicultura dal Grischun examinà gia avant la procedura d'approvaziun dal plan concreta differentas resalvas e differentas dumondas tecnicas. Ils scleriments mussan che la tecnologia ch'è vegnida tschernida basegna bain dapli spazi a las duas fins da la lingia, ma ch'ella po transportar current cuntinuà cun la pli pitschna perdita d'energia e cun la pli gronda fidaivladad sur cabels ch'èn vegnids tratgs tras il conduct d'atschal da la firma Oleodotto del Reno SA.
Cun il conclus dals 3 da matg 2006 ha il cussegl federal integrà il project d'ina colliaziun da current cuntinuà tranter la regiun da la Tumleastga e quella da Verderio/Italia cun ina tensiun da 400 kilovolts e cun ina capacitad da transport dad 1'100 megawatts en il plan secturial "lingias da transmissiun" (PSL). Essenzialmain vul quest project profitar dal conduct da la Oleodotto del Reno SA ch'è gia ord funcziun dapi 10 onns per il transport sutterran d'electricitad. Cun ina tala lingia da current cuntinuà spera la petenta Greenconnector SA da gidar a meglierar las structuras da provediment naziunalas ed europeicas. Il punct central da l'indriz èn - ultra dal fatg che dus cabels d'auta tensiun èn vegnids tratgs tras il conduct d'atschal da la Oleodotto del Reno SA - mintgamai ina staziun da converter a las duas fins da la lingia.
Il rapport explicativ tar il PSL ha concludì tranter auter che l'evaluaziun cumplessiva dal lieu da staziunament ha mussà che, sch'ins resguarda las cundiziuns generalas mumentanas sco la grondezza da la staziun da converter u il stadi da las tecnologias ch'èn sa cumprovadas en la pratica, haja in lieu da staziunament en la Tumleastga - cun emprima prioritad sin il territori communal da Tusaun - en cumparegliaziun las meglras premissas e premettia las intervenziuns ecologicas las pli pitschnas. Potenzials da conflict èn vegnids constatads numnadamain en connex cun la staziun da converter ed en connex cun la lingia da current alternant tranter la substaziun da Seglias e la staziun da converter.

Las dumondas tecnicas èn scleridas
Suenter la procedura che ha chaschunà ch'il project è vegnì integrà en il PSL, ha il schef dal departament da construcziun, traffic e selvicultura procurà ch'i vegnian scleridas differentas resalvas ed objecziuns visavi il project. Per quest intent ha el nominà ina gruppa da contact. Questa gruppa è stada sut la direcziun da l'uffizi d'energia ed è sa cumponida da represchentantas e da represchentants da las vischnancas da staziunament, da las vischnancas vischinas sco er da la regiun. Essenzialmain han ils scleriments dà infurmaziuns supplementaras davart il project sco tal e davart sias consequenzas gia avant ch'i vegnia instradada in'eventuala procedura d'approvaziun dal plan concreta. Per quest intent èn vegnids dumandads er parairis d'expertas e d'experts, en spezial pertutgant la dumonda da la concepziun tecnica dal project Greenconnector sco er pertutgant la chargia da las lingias d'auta tensiun en Tumleastga.
Ils giudicaments han purtà al resultat principal, ch'i na dettia - per ina lingia da cabel e per ina tala lunghezza dal traject da transmissiun - nagina alternativa realistica per il transport da current cuntinuà che quella sur ina lingia d'auta tensiun. Areguard la tecnologia che vegn proponida per midar current alternant en current cuntinuà empermettia la tecnologia da LCC (line commutated converter), ch'è vegnida tschernida, da minimalisar il pli fitg las ristgas tecnicas sco er las perditas d'energia e da garantir en moda la pli effizienta la fidaivladad da la colliaziun. Areguard ina tecnologia alternativa da VSC (voltage source converter), la quala duvrass damain spazi per sia staziun da converter, n'existan - tenor il parairi da terzas persunas - naginas applicaziuns praticas tar ina prestaziun da basa maximala da 1'100 megawatts. Che questa tecnica saja main effizienta e redubleschia per exempel la perdita d'energia hai gì num.
Las infurmaziuns ch'èn vegnidas procuradas en il fratemp duain gidar a giuditgar pli tard in'eventuala dumonda d'approvaziun dal plan. En il rom da quest project restan garantidas las pussaivladads da cooperar e da protestar da las persunas pertutgadas.
La Greenconnector SA vegn ussa a sviluppar vinavant il project, a l'optimar en differents puncts, ad analisar mesiras da cumpensaziun ed alura puspè a tractar ils resultats en in stretg contact cun ils uffizis chantunals cumpetents e cun las vischnancas pertutgadas.

Gremi: uffizi d'energia
Funtauna: rg uffizi d'energia