La regenza grischuna ha relaschà il concept grischun da pedagogia speziala (concept per la scola speziala) dal mars 2007. Pervia da la nova concepziun da la gulivaziun da finanzas e da las incumbensas tranter la confederaziun ed ils chantuns (NGF) èsi stà necessari da sviluppar quest concept.

Cun la NGF ston ils chantuns surpigliar cumplainamain la responsabladad per il sectur da la scola speziala. Pervia da quai ston ils chantuns cumprovar en concepts per la scola speziala, co ch'els vulan ademplir lur responsabladad en quest sectur. Per sviluppar il concept per la scola speziala han en emprima lingia stuì vegnir resguardads ils interess dals uffants pertutgads en la scola regulara ed en la scola speziala, alura però er las directivas sin plaun federal.
Per las instituziuns ch'èn responsablas per la scola (vischnancas da standard) na sa mida - durant la fasa transitorica dals onns 2008 fin 2011 - praticamain nagut en l'usche¬numnà sectur bass (classas pitschnas, logopedia, terapia da legastenia e.u.v.). Cun vischnancas e cun regiuns che sa participeschan en il senn da projects da pilot duain dentant vegnir rimnadas experientschas en il sectur bass durant questa fasa, e quai cun indemnisaziuns pauschalas. Questas vischnancas surpiglian l'incumbensa da garantir las purschidas ed il chantun sa participescha en moda pauschala als custs correspundents tenor il dumber total da scolaras e da scolars. A partir da l'onn 2011 duai il chantun - premess ch'ils resultats dal project da pilot sajan positivs - sa participar mo pli en moda pauschala vi da la purschida da basa da la pedagogia speziala da tut las instituziuns ch'èn responsablas per la scola. Actualmain sa participeschan l'assicuranza d'invaliditad ed il chantun vi dals custs dal cas singul concret.
Durant la fasa transitorica dals onns 2008 fin 2011 duain las purschidas en il sectur aut (instrucziun tras scolas spezialas) vegnir garantidas vinavant en furma externa, interna ed integrativa. Per quest intent vegnan manads centers da cumpetenza per la scola speziala. En la fasa transitorica vegnan finanziads ils centers da cumpetenza per la scola speziala ed il servetsch da pedagogia curativa tenor la pratica vertenta en il senn d'ina cuvrida dal deficit. Considerond il temp suenter l'onn 2011 vegnan fatgs - per rimnar experientschas, e quai ultra dal rendaquint ordinari dals centers da cumpetenza per la scola speziala e dal servetsch da pedagogia curativa - rendaquints parallels sin basa da contribuziuns chantunalas pauschalisadas. A partir da l'onn 2011 duai il subvenziunament da vart dal chantun vegnir fatg sche pussaivel mo pli en moda pauschalisada.
Las experientschas dal sectur bass e dal sectur aut che vegnan fatgas en la perioda dals onns 2008 fin 2011 duain dar infurmaziuns al departament d'educaziun, cultura e protecziun da l'ambient, per ch'el possia optimar ils sistems da finanziaziun e stgaffir la basa per pudair predir en moda relativamain precisa, quant ch'il sistem nov vegn a valair. Las instituziuns da las scolas spezialas involvidas sco er las vischnancas e las regiuns duain vegnir a savair ad ura cun tge contribuziuns ch'ellas pon far quint suenter la scadenza da la fasa transitorica, q.v.d. a partir da l'onn 2011, e cun tge adattaziuns ch'ellas pudessan eventualmain optimar lur situaziun.

Gremi: regenza
Funtauna: rg chanzlia chantunala dal Grischun