Il chantun Grischun vul finanziar ils servetschs da la tgira ed assistenza a chasa (spitex) sco er da la cussegliaziun per mammas e per babs da nov cun in sistem che s'orientescha a la prestaziun. Regladas da nov vegnan er las contribuziuns d'investiziun ch'il chantun paja a chasas da persunas attempadas e da tgira sco er a gruppas da tgira. Las novaziuns duain recumpensar ils servetschs che lavuran en moda economica e curreger il fatg ch'il chantun tracta en moda ineguala las differentas furmas d'abitar e d'assistenza. La regenza grischuna ha deliberà la missiva correspundenta tar la lescha per promover la tgira da persunas malsaunas per mauns dal cussegl grond. Quel vegn a tractar questa fatschenta en la sessiun da zercladur 2007.
Il sistem actual cun la finanziaziun da deficit na dat nagins impuls als servetschs da la spitex da lavurar en moda economica. Servetschs che han in deficit pli grond survegnan contribuziuns chantunalas pli autas che servetschs che lavuran en moda economica. Da nov duai in sistem da finanziaziun che s'orientescha a la prestaziun substituir la finanziaziun da deficit vertenta. En quest connex paja il chantun ina contribuziun fixa per mintga unitad da prestaziun che vegn furnida. Tar las prestaziuns cun dretg da contribuziun tutgan prestaziuns da tgira, da tegnairchasa e d'assistenza sco er il servetsch da pasts. Il sistem nov remunerescha ils servetschs che lavuran en moda economica ed engrondescha lur libertad d'agir.
Er en il sectur da la cussegliaziun per mammas e per babs duai la finanziaziun da deficit vegnir substituida. Per l'emprim onn da vita d'in uffant che viva en la regiun vegn pajada da nov la contribuziun chantunala en furma d'ina contribuziun pauschala. Questa cussegliaziun duai esser gratuita er en l'avegnir.
La fin finala duai la finanziaziun da las investiziuns da las chasas da persunas attempadas e da tgira sco er da las gruppas da tgira vegnir midada en il senn dal princip da la politica da vegliadetgna "ambulant avant staziunar". Oz subvenziunescha il maun public ils custs d'abitaziun praticamain per 100 pertschient. Quai è in tractament inegual cumpareglià cun las furmas d'abitar e d'assistenza sco per exempel la tgira ed assistenza a chasa u las abitaziuns da persunas attempadas assistidas.
Da nov vegnan differenziadas trais categorias d'investiziun en las chasas da tgira. L'emprima categoria d'investiziun cumpiglia las novas construcziuns ed ils engrondiments, cun ils quals i vegnan mess a disposiziun ils letgs ch'èn necessaris tenor la planisaziun generala chantunala. Per tals projects da construcziun paja il chantun ina contribuziun pauschala per mintga letg che vegn stgaffì supplementarmain. La segunda categoria pertutga la transfurmaziun da chombras da dus letgs en chombras d'in letg. Quella vegn er sustegnida cun ina contribuziun chantunala pauschala per mintga chombra che vegn stgaffida supplementarmain, e quai fin ad ina quota da chombras d'in letg da 90 pertschient. Naginas contribuziuns pli na vegnan percunter pajadas a la terza categoria, numnadamain a la categoria d'investiziun per reparar e per renovar edifizis existents. Quellas ston vegnir finanziadas da nov tras ils pajaments da tariffas da las abitantas e dals abitants da las chasas da tgira. Tut tenor la chasa da tgira resultan eventualmain tariffas ch'èn levamain pli autas per sias abitantas e per ses abitants. Sche las abitantas e sch'ils abitants da las chasas da tgira n'èn betg en cas da pajar las tariffas cumplainas pervia da lur situaziun d'entrada e da facultad, survegnan ellas ed els prestaziuns supplementaras en la dimensiun correspundenta.
La revisiun parziala da la lescha per promover la tgira da persunas malsaunas è concepida uschia che la realisaziun dals trais secturs è - tut en tut - neutrala areguard ils custs, e quai tant per il chantun sco er per las vischnancas. Da las contribuziuns federalas en l'autezza da circa 4,5 milliuns francs ch'èn vegnidas pajadas fin ussa als servetschs da la spitex e che crodan a partir dal cumenzament 2008, perquai che la nova concepziun da la gulivaziun da finanzas e da las incumbensas tranter la confederaziun ed ils chantuns (NGF) entra en vigur, surpiglian il chantun 2,8 milliuns francs e las vischnancas 1,7 milliuns francs. Ils custs supplementars da las vischnancas vegnan er cumpensads cumplainamain grazia al fatg che lur obligaziun da pajar quella differenza da las tariffas da las chasas da tgira che las abitantas e ch'ils abitants n'èn betg en cas da pajar cun lur entradas, croda pervia da la NGF. Ils custs supplementars che la NGF chaschuna per il chantun pon eventualmain vegnir gulivads cumplainamain cun meds finanzials che n'èn betg liads ad in intent.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun