En la sessiun da zercladur 2007 vegn il cussegl grond a tractar la missiva tar l'independenza da la cassa da pensiun chantunala (CP). La cumissiun predeliberanta ch'è vegnida nominada per quest intent ha predeliberà questa missiva sut il presidi dal deputà Luca Tenchio per mauns dal cussegl grond. A la sesida da la cumissiun è sa participada er la cussegliera guvernativa Eveline Widmer-Schlumpf.
Sco che la regenza explitgescha en sia missiva, ha il cussegl grond concludì l'onn 2000 la finanziaziun restanta e l'independenza giuridica da la cassa da pensiun. En quest connex eri previs da surdar a la CP l'independenza giuridica ed organisatorica per il 1. da schaner 2012. Suenter che la finanziaziun restanta da la CP ha pudì vegnir terminada gia l'onn 2005 e betg sco previs oriundamain en il decurs dals onns 2005 fin 2011, èsi pussaivel da realisar l'independenza giuridica da la CP gia pli baud.
Ultra da l'independenza da la cassa èn la determinaziun dal subject giuridic, la nova definiziun dal circul da las persunas assicuradas, l'aboliziun dals artitgels 36 - 41 da la lescha davart las finanzas dal chantun Grischun concernent las instituziuns da prevenziun professiunala sco er la fixaziun dal grad d'autonomia da la CP ulteriurs puncts centrals da la revisiun.
Suenter avair discutà il project en moda intensiva propona la cumissiun al cussegl grond unanimamain d'entrar en il project e da deliberar il sboz da lescha cun tschertas midadas.

Gremi: cumissiun predeliberanta per la revisiun parziala da la lescha davart la cassa da pensiun
Funtauna: rg cumissiun predeliberanta per la revisiun parziala da la lescha davart la cassa da pensiun