Il tudestg da scrittira duai vegnir promovì optimalmain en las
scolas dal Grischun. Pervia da quai èsi previs da cumenzar cun quella
promoziun gia en scolina, e quai cun lavurs preparatoricas adattadas
correspundentamain. Ils proxims mais vegnan las persunas d'instrucziun
da las scolinas pertutgadas e las commembras resp. ils commembers da las
autoritads infurmads e scolads specificamain en quest connex.
Per promover la moda da s'exprimer da scolaras e da scolars
grischuns ha il departament d'educaziun mess en vigur il schaner 2006
las "directivas davart la lingua da standard tudestg en la scola
populara dal chantun Grischun". La finamira da questas directivas è da
rinforzar la posiziun dal tudestg da scrittira en la scola populara dal
Grischun, dentant senza indeblir il dialect.
Studis scientifics renvieschan al fatg ch'ina promoziun optimala dal
tudestg da scrittira stuess cumenzar gia avant l'entrada en scola. En
cunvegnientscha cun la federaziun da las mussadras dal Grischun (FMGR)
ha il departament d'educaziun incumbensà la scola auta da pedagogia da
sviluppar in concept correspundent. Quel è ussa avant maun. En il decurs
da las proximas emnas e dals proxims mais vegnan las persunas
d'instrucziun da las scolinas pertutgadas sco er las commembras resp.
ils commembers da las autoritads responsablas infurmads davart quest
concept e preparads per sia realisaziun.
Il concept prevesa d'introducir en tut las scolinas en il decurs
dals proxims trais onns ch'il dialect e ch'il tudestg da scrittira
vegnan duvrads in sper l'auter, e quai en moda conscienta e motivada. La
lavur en la pratica ha mussà ch'ina tala organisaziun da las linguas n'è
nagin problem per ils uffants.
Renviament per las medias:
Ulteriuras indicaziuns che concernan las "directivas davart la
lingua da standard tudestg en la scola populara dal chantun Grischun"
sco er il concept "tudestg standard en scolina" chattais Vus sin la
pagina d'internet da l'uffizi per la scola populara ed il sport
(www.avs-gr.ch).
Gremi: uffizi per la scola populara ed il sport
Funtauna: rg uffizi per la scola populara ed il sport