En la sessiun d'october 2008 vegn la regenza a suttametter al
cussegl grond la missiva tar la revisiun parziala da la lescha davart la
banca chantunala grischuna. Sut la direcziun da Mario Cavigelli ha la
cumissiun per economia e taxas (CET) predeliberà la missiva per mauns
dal cussegl grond. A questa sesida èn er stads preschents il cusseglier
guvernativ Martin Schmid ed il president da la banca chantunala
grischuna (BCG) Hans Hatz.
Cun questa revisiun da la lescha davart la BCG prenda la regenza en
mira ina gestiun d'interpresa ("corporate governance") che correspunda a
las enconuschientschas dad oz, che duai augmentar la transparenza da
l'agir d'interpresa e che duai cuntanscher ina relaziun equilibrada
tranter la gestiun e la controlla. In'ulteriura finamira è la
depolitisaziun da las elecziuns dal cussegl da banca. Per tegnair quint
da las finamiras da questa revisiun vegn la BCG d'ina vart suttamessa ad
ina refurma organisatorica. Da l'autra vart vegnan l'elecziun da las
commembras e dals commembers dal cussegl da banca sco er la surveglianza
regladas da nov.
En sia missiva propona la regenza concretamain da reducir il dumber
da commembras e da commembers dal cussegl da banca, e quai dad
actualmain 11 a 7. Colliada cun quai è l'aboliziun da la giunta dal
cussegl da banca, uschia che la BCG dumbra en l'avegnir quatter organs,
numnadamain il cussegl da banca, la direcziun sco er il post da revisiun
intern ed il post da revisiun extern.
In auter punct central da la revisiun è la nova definiziun da
l'autoritad electorala dal cussegl da banca. Tenor il sistem actual
elegia il cussegl grond las commembras ed ils commembers dal cussegl da
banca. Da nov na duain las commembras ed ils commembers dal cussegl da
banca betg pli vegnir elegids dal cussegl grond, mabain da la regenza. A
medem temp duai la regenza er approvar il rapport annual ed il quint
annual - cumpetenzas ch'eran fin ussa er tar il cussegl grond.
La CET è sa fatschentada detagliadamain cun quest project. Suenter
ina discussiun per part cuntraversa davart singuls artitgels è ella
vegnida a la conclusiun da suandar las propostas da la regenza e da
proponer al cussegl grond da deliberar quest project tenor la missiva.
Infurmaziuns:
pledader da la cumissiun Mario Cavigelli, tel. 079 677 63 54
Gremi: cumissiun per economia e taxas
Funtauna: rg cumissiun per economia e taxas