La regenza grischuna propona al cussegl grond ina revisiun parziala da la lescha davart las scolas medias. Questa revisiun parziala ha l'intenziun da mantegnair il gimnasi inferiur, ma er da meglierar la qualitad da la scolaziun gimnasiala. Er en il futur duai la scolaziun gimnasiala durar sis onns per uffants che cumenzan il gimnasi inferiur suenter la sisavla classa primara. Sch'il gimnasi vegn cumenzà suenter la segunda classa secundara, duain vegnir absolvids quatter onns fin tar la maturitad. Igl è previs ch'il cussegl grond vegn a tractar la fatschenta l'avrigl 2008.
Da nov vegn il cussegl grond a reglar il concept da la scolaziun gimnasiala en la lescha davart las scolas medias. En spezial vegn el a determinar, sch'i vegn purschì vinavant in gimnasi inferiur en il chantun Grischun ed a fixar la durada da la scolaziun gimnasiala. El ha incumbensà la regenza d'al suttametter pliras variantas per quest champ da regulaziun. Las variantas duain esser formuladas fin al stgalim d'ina lescha.
La regenza aveva dà en consultaziun tschintg differentas variantas. Da questas variantas fascheva part l'aboliziun dal gimnasi inferiur cumbinada cun ina scolaziun che avess durà quatter u tschintg onns fin tar la maturitad, la cuntinuaziun da la regulaziun vertenta cun in gimnasi da sis u da quatter onns sco er la proposta dals recturs cun in gimnasi da sis e cun in gimnasi da tschintg onns. Igl è er stà en discussiun da mantegnair il gimnasi inferiur en las regiuns, ma da desister d'in tal a Cuira.
L'evaluaziun da las posiziuns ha mussà che las vuschs che approveschan il gimnasi inferiur e quellas che al refuseschan sa tegnan circa la ballantscha. Las regiuns cun in ferm stgalim superiur da la scola populara pretendan plitost d'abolir il gimnasi inferiur, entant che las regiuns cun ina scola media s'expriman en favur d'in mantegniment da tal. Las partidas politicas vulan mantegnair il gimnasi inferiur a tschertas cundiziuns. Il model dals recturs ch'è vegnì mess en discussiun chatta il sustegn da las regiuns che han ina scola media, entant che las posiziuns or da las vals talianas refuseschan categoricamain quest model. Da pliras varts vegni pretendì da meglierar la qualitad da la scolaziun gimnasiala en il Grischun, da dar dapli profil al gimnasi inferiur e d'optimar la procedura d'admissiun da la scola populara al gimnasi.
Resguardond questas posiziuns propona ussa la regenza en sia missiva al cussegl grond da cumplettar il concept actual dal gimnasi cun elements dal model dals recturs. Ils cuntegns didactics al gimnasi inferiur (matematica, scienzas natiralas, latin) duain ademplir pretensiuns pli grondas e la procedura d'admissiun suenter la sisavla respectivamain suenter l'otgavla classa duai vegnir optimada. L'admissiun a la scola media commerziala u professiunala duai succeder ussa suenter l'otgavla classa. La regenza motivescha sia proposta er cun ponderaziuns da la politica regiunala ed accentuond l'impurtanza da las scolas medias per l'economia publica dals lieus da scola.

Gremi: regenza
Funtauna: rg chanzlia chantunala dal Grischun