La regenza grischuna refusa la revisiun totala da la lescha federala
davart las acquisiziuns publicas (LAP). Il sboz saja centralistic e
giuridicamain problematic. En sia resposta a la confederaziun davart la
consultaziun suonda la regenza la posiziun da la conferenza svizra da
las directuras e dals directurs da construcziun, da planisaziun e da
protecziun da l'ambient (CCPA) che ha en questa procedura da
consultaziun la direcziun per tut las ulteriuras conferenzas da las
directuras spezialisadas e dals directurs spezialisads dals chantuns.
Tenor la regenza datti gronds dubis davart la legitimaziun
constituziunala da la confederaziun da vulair reglar il sectur da las
acquisiziuns publicas per tut la Svizra cun ina lescha federala. Cun ses
project da revisiun intervegn la confederaziun considerablamain en il
champ da cumpetenza dals chantuns sut il pretext ch'ina armonisaziun dal
dretg davart las acquisiziuns publicas saja absolutamain urgenta e
necessaria en tut la Svizra. Ils basegns ed ils giavischs da l'economia
per in'execuziun che tegna quint da l'economia na vegnan betg ademplids
cun il project da revisiun. D'ina vart na vegnan las proceduras betg
simplifitgadas. Anzi, cun ses project da revisiun chaschuna la
confederaziun nunnecessariamain in fracziunament supplementar dal dretg
tranter la confederaziun, ils chantuns e las vischnancas. Da l'autra
vart duain las valurs minimalas per acquisiziuns che ston vegnir
publitgadas er vegnir reducidas a valurs da la confederaziun ch'èn per
gronda part pli bassas. Uschia vegn dentant engrondida la lavur
administrativa per tut las parts participadas. Cun il sboz preschentà
(en tut 89 artitgels, 5 agiuntas) na vegn la finala cleramain betg
cuntanschida la finamira da concentrar la legislaziun sin ils puncts
essenzials.
Ils chantuns han gia oz ina regulaziun ed in pratica d'acquisiziun
che vala per els e per las vischnancas, ch'è accordada e che
funcziunescha bain tant en il sectur internaziunal sco er en il sectur
naziunal. In basegn da revisiun acut per ils chantuns e per las
vischnancas n'è pia betg avant maun.
Il project da revisiun che vegn accelerà da la confederaziun
signifitgass per ils chantuns cleramain in regress en il sectur da las
acquisiziuns publicas. Tras quai vegnissan regulaziuns impurtantas ch'èn
incontestadas e cumprovadas dapi onns, sco la transparenza, il scumond
da contractar per pretschs, il tractament egual e la nundiscriminaziun
sco er la protecziun giuridica lomiadas cumplettamain. Pervia da quai
refusa la regenza decididamain - en concordanza cun la CCPA - il sboz
preschentà per ina nova lescha federala davart las acquisiziuns publicas
cun l'argument che quai saja ina soluziun centralistica.
Infurmaziuns:
- Stefan Engler, president da la regenza e schef dal departament da
construcziun, traffic e selvicultura, tel. 081 257 36 01
- Alberto Crameri, secretari dal departament da construcziun,
traffic e selvicultura dal Grischun, tel. 081 257 36 11
La lescha davart ils supplements da famiglia vegn messa en
vigur per il 1. da schaner 2009
En il chantun Grischun vegnan augmentads ils supplements da
famiglia. La regenza grischuna ha mess en vigur la revisiun parziala da
la lescha davart ils supplements da famiglia per il 1. da schaner 2009.
A medem temp ha ella adattà las disposiziuns executivas tar la lescha.
Il cussegl grond aveva concludì il zercladur 2008 ina revisiun
parziala da la lescha davart ils supplements da famiglia. Las
adattaziuns èn necessarias per ch'il chantun Grischun adempleschia las
novas prescripziuns da la confederaziun en il sectur dals supplements da
famiglia. Da l'autra vart èsi vegnì renunzià a supplements da famiglia
per persunas cun activitad da gudogn independenta. Il termin da
referendum è scadì senza ch'i saja vegnì fatg in tal.
En las disposiziuns executivas tar la lescha davart ils supplements
da famiglia ha la regenza ussa fixà las tariffas dals supplements. La
tariffa minimala importa per mais 220 francs per ils supplements per
uffants e 270 francs per ils supplements per scolaziun. En il Grischun
importavan ils supplements per uffants fin ussa 195 francs per mais ed
ils supplements per scolaziun 220 francs per mais.
La revisiun totala da la lescha federala davart la promoziun da la
gimnastica e dal sport vegn beneventada
La revisiun totala planisada da la lescha federala davart la
promoziun da la gimnastica e dal sport vegn sustegnida da la regenza
grischuna. Sco che la regenza punctuescha en sia consultaziun, sa tracti
qua d'in project da lescha che ha finamiras raschunaivlas concernent
l'effect, che metta ils accents en moda equilibrada e che cumplettescha
la lescha vertenta cun cleras intenziuns. Il motiv da la revisiun totala
è quel che la lescha per promover il sport da l'onn 1972 na correspunda
betg pli a las pretensiuns actualas d'ina legislaziun moderna.
La regenza beneventa en spezial la finamira d'integrar
sistematicamain tut las acturas e tut ils acturs dal sectur per la
promoziun dal sport e dal moviment. En cas da las singulas mesiras e
dals singuls projects da promoziun ch'èn planisads han il sectur da
giuventetgna e sport sco er il sectur dal sport en scola l'impurtanza la
pli gronda.
La regenza crititgescha la lescha federala davart la
prevenziun e la promoziun da la sanadad
La regenza grischuna refusa il sboz per ina lescha federala davart
la prevenziun e la promoziun da la sanadad. Quel propona mesiras
preventivas e mesiras che promovan la sanadad per prevegnir e per
constatar a temp malsognas fisicas e psichicas da l'uman ch'èn
transmissiblas, fitg derasadas u malignas. La lescha regla - ultra da la
direcziun e da la coordinaziun - en spezial er la repartiziun da las
incumbensas tranter la confederaziun ed ils chantuns.
La regenza sustegna dentant la tenuta ch'i saja - per motivs da
l'economia publica - indispensabel da rinforzar la prevenziun e la
promoziun da la sanadad. Tuttina na po ella betg approvar ils sbozs da
la lescha en questa furma. Il transferiment obligant da novas
incumbensas als chantuns cuntrafa a la repartiziun federala da las
cumpetenzas en il sectur da la promoziun da la sanadad e da la
prevenziun. Ultra da quai crititgescha la regenza il transferiment
d'incumbensas als chantuns, senza als metter a disposiziun ils meds
finanzials necessaris. La finala na vesa ella nagin motiv d'abolir la
fundaziun "Promoziun da la sanadad Svizra" ch'è vegnida fundada da las
assicuranzas e dals chantuns e da la transferir en l'Institut svizzer
per la prevenziun e per la promoziun da la sanadad ch'è previs sco
institut federal. Dals supplements per la prevenziun generala da
malsognas che vegnan incassads cun las premias da l'assicuranza da
malsauns duai disponer vinavant la fundaziun. La regenza refusa il
transferiment da questa cumpetenza per duvrar quests supplements a la
fundaziun.
La nova lescha davart la controlla da la segirezza vegn
refusada
La regenza grischuna refusa il sboz per ina nova lescha davart la
controlla da la segirezza. En sia consultaziun a la confederaziun
sustegna ella a la posiziun da la conferenza da las regenzas dals
chantuns alpins (CRCA).
La nova lescha davart la controlla da la segirezza intenziunescha da
reglar las proceduras per controllar e per examinar la segirezza
tecnica, dentant betg da reglar las pretensiuns da segirezza materiala a
singuls implants, vehichels, utensils, sistems da segirezza e
cumponentas. Tenor la regenza na sa laschi uschia betg meglierar u
augmentar materialmain la segirezza tecnica. La proposta na cuntanscha
betg la finamira previsa, anzi, ella tendescha da cumplitgar andaments e
proceduras efficazias e dals remplazzar tras in sistem ch'è char ed
inutil. Senza ina plivalur evidenta da segirezza n'è il sboz da lescha
preschentà pervia da quai betg necessari u inditgà.
Da vischnancas e da regiuns
Seewis: La revisiun parziala da la constituziun communala da la
vischnanca da Seewis, ch'è vegnida concludida da la radunanza communala
ils 29 d'avust 2008, vegn approvada.
Luzein: A la vischnanca da Luzein vegnan garantidas - tenor la nova
politica regiunala da la confederaziun (NPR) - ina contribuziun da
600'000 francs per il svilup da Pany Luzein ad in lieu turistic sco er
ina contribuziun chantunala da 300'000 francs. La cundiziun è che la
finanziaziun totala saja garantida.
Contribuziuns chantunalas a differentas instituziuns
Aclas Mantogna SA: A la Aclas Mantogna SA vegn concedì in credit
tenor la nova politica regiunala da la confederaziun (NPR) da 350'000
francs per la construcziun planisada da l'abitadi d'aclas "Aclas
Mantogna" a Tschappina. Per il project vegn ultra da quai garantida ina
contribuziun chantunala da 81'260 francs.
Parc Bener: A la "SA per la gestiun dal Parc Bener" sco instituziun
responsabla da la partiziun da tgira dal Parc Bener a Cuira vegn
garantida ina contribuziun chantunala d'investiziun da totalmain 480'000
francs al project per stgaffir trais ulteriurs letgs da tgira en la
partiziun da tgira dal Parc Bener.
Promoziun da la cultura: La regenza ha concedì contribuziuns da
totalmain 131'000 francs per promover 14 occurrenzas ed ovras
culturalas.
Societad da gimnastica da Landquart: La societad da gimnastica da
Landquart survegn ina contribuziun da maximalmain 16'200 francs or dal
fond da sport per cumprar saivs da concurrenza, blocs da partenza,
lattas da sigl en aut ed in indriz per mesirar il temp.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun