La regenza grischuna ha fixà las contribuziuns chantunalas 2008 per
las interpresas ch'èn activas en il traffic public regiunal. Tut en tut
sustegnan la confederaziun ed il chantun nov interpresas da traffic cun
contribuziuns da gestiun da circa 182 milliuns francs. La part ch'il
chantun sto surpigliar importa circa 40 milliuns francs. Da tut las
contribuziuns da gestiun van circa 135 milliuns francs (+6.7 milliuns
francs) a la viafier retica. Ultra da quai duain vegnir pajadas a la
viafier retica contribuziuns d'investiziun da circa 60 milliuns francs
(-1.9 milliuns francs). Qua importa la part chantunala 12 milliuns
francs.
Da vischnancas e da regiuns
- Puntraschigna: La regenza ha approvà il contract tranter il chantun
Grischun e la vischnanca da Puntraschigna per laschar surpigliar la
polizia chantunala incumbensas da la polizia communala. Las duas plazzas
supplementaras concludidas vegnan finanziadas da la vischnanca.
- Tavau: La revisiun parziala da la planisaziun locala da la
vischnanca da Tavau dals 27 da settember 2007 vegn approvada.
- Razén: La revisiun parziala da la planisaziun locala "Ratiras" da la
vischnanca da Razén dals 12 da december 2007 vegn approvada.
- Scuol: La revisiun parziala da la planisaziun locala da la
vischnanca da Scuol dals 25 da november 2007 vegn approvada.
Contribuziuns chantunalas a differentas instituziuns
- Uniun chantunala da chant dal Grischun: A l'uniun chantunala da
chant dal Grischun vegn concedida - en furma d'in "kick-off" per la fasa
iniziala 2008 dal project "A mintga uffant ses chor d'uffants" - ina
contribuziun da maximalmain 2'300 francs per mintga chor d'uffants ed en
tut maximalmain 46'000 francs.
- Project per il cudesch "Lilly Keller, Künstlerin": A las lavurs
scientificas per il project dal cudesch cun il titel "Lilly Keller,
Künstlerin" vegn concedì in import unic da 9'000 francs.
Fatgs dal persunal
Andrea Peter Seifert, domicilià a Trimmis, è vegnì elegì sco schef
da l'administraziun da finanzas. El cumenza sia plazza il 1. d'avust
2008 sco successur da Peter Crufer che va ils 31 d'avust 2008 en pensiun
parziala.
Gremi: regenza
Funtauna: rg chanzlia chantunala dal Grischun