Avert la procedura da consultaziun tar la lescha davart ils registers d'abitantas e d'abitants
La lescha federala davart l'armonisaziun dals registers d'abitants e d'auters registers uffizials da persunas (lescha davart l'armonisaziun dals registers) pretenda ch'ils chantuns relaschian ina legislaziun executiva. La regenza grischuna ha avert la consultaziun correspundenta tar il relasch d'ina lescha davart ils registers d'abitantas e d'abitants.
En la lescha davart l'armonisaziun dals registers prescriva la confederaziun als chantuns ed a las vischnancas d'unifitgar ils registers da persunas, en spezial ils register d'abitantas e d'abitants sco er ils gronds registers da persunas da la confederaziun en il sectur dal stadi civil, da las persunas estras sco er da las fugitivas e dals fugitivs. Ils registers ston vegnir unifitgads areguard il cuntegn, areguard la nomenclatura ed areguard l'actualitad e preparads per la transmissiun electronica standardisada da las datas. Quai porta avantatgs a la confederaziun, als chantuns ed a las vischnancas. Uschia na vegn la dumbraziun dal pievel a partir da l'onn 2010 betg pli fatga sco pli baud mintga 10 onns cun agid da questiunaris sin palpiri. Empè da quai duain las datas ch'èn avant maun en ils registers numnads vegnir analisadas quatter giadas ad onn en moda electronica per survegnir evaluaziuns statisticas. Da l'armonisaziun èn pertutgads en il chantun Grischun cunzunt ils registers d'abitantas e d'abitants. Tenor las directivas da la confederaziun ston quels vegnir armonisads fin l'onn 2010. Pervia da quai ha la regenza grischuna relaschà gia per il 1. d'october 2008 las disposiziuns transitoricas ch'èn necessarias per exequir a temp la lescha federala. Cun il sboz preschent per ina lescha davart ils registers d'abitantas e d'abitants duain er quellas disposiziuns vegnir remplazzadas.
Ils documents da consultaziun èn accessibels sur la pagina d'internet dal departament d'economia publica e fatgs socials www.dvs.gr.ch sut la rubrica temas/projects. La consultaziun dura fin ils 14 da november 2009.

Da vischnancas e da regiuns
Arosa: La revisiun parziala da la planisaziun locala "plazza da golf" da la vischnanca d'Arosa vegn approvada.
Tumleastga dador: La revisiun parziala dals statuts da la federaziun da reviers forestals da la Tumleastga dador vegn approvada.
Cazas:Il project cunter crudada da crappa "Vignolaweg" vegn approvà da la regenza e sustegnì cun ina contribuziun da maximalmain 481'250 francs.
La Punt Chamues-ch: A la vischnanca da La Punt Chamues-ch vegn dada la permissiun da manar la scola primara e la scolina en moda bilingua a partir da l'onn da scola 2009/10.
Maiavilla: La revisiun parziala da la planisaziun locala "Bündtli, Oberes Herrenfeld" da la vischnanca da Maiavilla dals 24 da zercladur 2009 vegn approvada.
Valragn: La regenza approvescha ils statuts d'organisaziun da la "federaziun da pumpiers da Valragn". Els vegnan mess en vigur retroactivamain per il 1. da schaner 2009.
Seewis: La revisiun totala da la planisaziun locala da la vischnanca da Seewis dals 30 da schaner 2009 vegn approvada cun las cundiziuns e cun las resalvas usitadas.
Vrin, Lumbrein: Ils statuts dal consorzi da scola Vrin / Lumbrein vegnan approvads da la regenza.

Contribuziuns chantunalas a differentas instituziuns
Federaziun forestala dal Grischun: La regenza approvescha ina contribuziun chantunala da 51'000 francs per la federaziun forestala dal Grischun SELVA.
Promoziun da la cultura: Il project "publicaziuns davart la viafier dal Bernina" vegn sustegnì cun ina contribuziun da maximalmain 89'000 francs.

Projects da vias
La regenza ha approvà totalmain 2'523'000 francs per construir e per sanar ils suandants trajects da vias:

• via naziunala A13: lavurs d'electroinschigner San Bernardin, portal dal nord - Tusaun
• via naziunala A28: mesiraziun dal project total Landquart - Claustra/Selfranga
• via d'Avras: lavurs d'impressari, Rofla - Giuf
• via dal Partenz: lavurs d'impressari e da cuvrida, Landquart - Fideris
• via dal Meir: lavurs da stuppadira e da cuvrida, Freihof - Solas

Chanzlia chantunala dal Grischun
Gremi: regenza
Funtauna: rg chanzlia chantunala dal Grischun