Sut il presidi dal president da la cumissiun Christoph Jaag ha la cumissiun per ambient, traffic ed energia dal cussegl grond predeliberà la missiva da la regenza davart la contribuziun d'investiziun per la rait da provediment da chalur a distanza dal stabiliment per arder ruments (SAR) da Trimmis a Cuira nord ed ha approvà e deliberà ella per mauns dal cussegl grond. A la sesida èn sa participads er il cusseglier guvernativ Stefan Engler sco er represchentantas e represchentants da l'administraziun.
Ina cuminanza d'interess (instituziun responsabla) che consista da la corporaziun da vischnancas per la dismessa da rument en il Grischun (GEVAG), Trimmis, da la IBC "energia aua", Cuira, e da l'ospital chantunal dal Grischun, planisescha da construir in conduct da chalur a distanza davent dal stabiliment per arder ruments a Trimmis fin a Cuira per stgaudar uschia l'ospital chantunal e la scola chantunala sco er autras immobiglias pli grondas en il territori da Cuira nord. Sin dumonda da l'instituziun responsabla propona la regenza al cussegl grond ch'il chantun duai sa participar cun 3,7 milliuns francs vi dals custs d'investiziun da totalmain 27 milliuns francs.
La regenza e la cumissiun èn persvasas dal grond potenzial da la chalur a distanza. Quai mussa er l'augment da construcziuns novas e d'engrondiments d'autras raits da provediment da chalur a distanza en Svizra. En connex cun grondas midadas dal pretsch d'energia e cun tendenzas generalas en direcziun d'ina stgarsezza da l'energia contribueschan er tals projects che tiran a niz la chalur persa d'energias regenerablas considerablamain a la segirezza dal provediment ed a custs d'energia che pon vegnir calculads meglier. Per la cumissiun èsi ultra da quai cler che la chalur a distanza che vegn producida d'energia regenerabla sustegna la politica chantunala, naziunala ed internaziunala da reducir il consum da purtaders d'energia fossils sco er la svapur da substanzas nuschaivlas e da CO2. L'utilisaziun da chalur persa - sco che quai è il cas tar il SAR da Trimmis - e l'alimentaziun da raits da chalur a distanza cun tala è spezialmain raschunaivel, perquai ch'i vegn utilisada chalur che vegn tuttina producida. Cun l'utilisaziun extendida planisada da la chalur persa dal SAR da Trimmis pudessan vegnir utilisadas - tenor las indicaziuns en la missiva a la regenza - supplementarmain circa 40 milliuns kWh per onn. Quai correspundess a 3,8 milliuns equivalents dad ieli da stgaudar. Quai reduciss la svapur da CO2 per circa 8800 tonnas per onn. La part centrala da la rait da provediment da chalur a distanza dal SAR da Trimmis a Cuira nord consista - tenor il project - da dus bischens che vegnan mess en la terra per lung da l'autostrada A13. Els mainan l'aua ch'è vegnida stgaudada a 120° Celsius cun arder rument a Cuira nord resp. l'aua che vegnida sfradenta dal diever en ils stgaudaments dals edifizis puspè enavos al SAR da Trimmis.
La cumissiuns è er sa fatschentada detagliadamain cun la dumonda da la rentabilitad. La regenza ha confermà ch'ina utilisaziun da la chalur persa che deriva da l'arder rument na po per regla anc betg esser rentabla, e quai spezialmain pervia da la gronda distanza fin tar las utilisadras e tar ils utilisaders e pervia dals pretschs da referenza ch'èn actualmain bass, en spezial da l'ieli. Tals projects èn dependents da contribuziuns dal maun public. Tenor l'avis da la cumissiun èsi, sch'ins guarda vers il futur, tuttina raschunaivel d'utilisar uschè optimalmain sco pussaivel la chalur che vegn producida al lieu cun pitschens custs ed en moda neutrala en quai che reguarda il CO2 e da promover ina tala utilisaziun. La contribuziun d'investiziun dal chantun da 3.7 milliuns francs duai vegnir finanziada cun in import dad 1.2 milliuns francs dal preventiv d'investiziun ordinari e da 2.5 milliuns francs sco mesira per stabilisar la conjunctura.
La cumissiun predeliberanta ha surpiglià tut ils puncts da la missiva da la regenza ed ha deliberà la fatschenta unanimamain per mauns da la sessiun d'avust 2009 dal cussegl grond.

Infurmaziuns:
Christoph Jaag, president da la cumissiun per ambient, traffic ed energia,
tel. 081 330 44 14

Gremi: cumissiun per ambient, traffic ed energia
Funtauna: rg cumissiun per ambient, traffic ed energia