La collavuraziun da la confederaziun e dals chantuns per il portal ch.ch duai cuntinuar
Il chantun Grischun vul cuntinuar la collavuraziun cun la confederaziun e cun auters chantuns per manar il portal d'internet svizzer www.ch.ch. En ina consultaziun a la confederaziun propona la regenza grischuna da renovar la cunvegna respectiva per ils onns 2011 fin 2014.
A l'avis da la regenza gida la cunvegna a promover la collavuraziun, l'armonisaziun e la standardisaziun dal sectur dad e-government sin tut ils plauns statals. Per optimar il niz dal portal sajan dentant necessarias ulteriuras mesiras, di la regenza. La purschida d'infurmaziuns sin www.ch.ch duai vegnir engrondida e standardisada. Cun preferenza duain er vegnir creadas pli e pli purschidas d'interacziun e da transacziun. Quai èn prestaziuns d'autoritads che pon vegnir regladas cumplettamain en furma electronica ed automatisada. Consequentamain s'augmenta l'effizienza e resulta ina distgargia administrativa per las interpresas, per las persunas privatas, per las organisaziuns e per las autoritads. La premissa per quest svilup è ch'i vegnia mess a disposiziun a la confederaziun, als chantuns ed a las vischnancas ina suttascripziun digitala ed in servetsch da formulars electronics. Questas prescripziuns èn impurtantas er per l'ulteriur svilup da la purschida dad e-government en ils chantuns ed en las vischnancas.
Il nov sboz da la cunvegna per la gestiun dal portal observa per gronda part las reglas vertentas. Ils custs totals e lur repartiziun èn restads tals e quals. Ils chantuns surpiglian sco fin ussa la mesadad dals custs da gestiun dad 1.2 milliuns francs. Il chantun Grischun sa participescha cun ina contribuziun annuala maximala da 14'800 francs.

Il segund pass da la "refurma da la viafier 2" da la confederaziun va en la dretga direcziun
La regenza grischuna va da princip d'accord cun las ulteriuras mesiras che la confederaziun ha planisà per la refurma da la viafier. Sia resposta da consultaziun pertutgant il segund pass da la refurma da la viafier 2 suonda la posiziun da la conferenza da las directuras e dals directurs chantunals dal traffic public.
Il segund pass da la refurma da la viafier 2 cuntegna differentas tematicas. Per l'ina vegnan garantids l'access senza discriminaziuns a la rait e l'interoperabilitad da la rait da viafier europeica. Per l'autra vegnan agiuntadas la basa legala per publicaziuns en connex cun bus ed ina reglamentaziun per la finanziaziun dals servetschs militars.
A l'avis da la regenza fan ils puncts preschentads in pèr ulteriurs pass en la dretga direcziun. Ina paisa speziala dat la regenza al tractament egual da tut las interpresas da transport. Plinavant èsi da far attenziun che las finamiras avisadas - sco transparenza, economia da martgà e tractament egual - na vegnian betg cumbinadas cun memia gronds custs administrativs.

Las contribuziuns a Grischun vacanzas vegnan augmentadas
Il chantun augmenta sias contribuziuns ordinarias a l'uniun Grischun vacanzas. Per l'onn 2010 survegn l'organisaziun da turissem 6.123 milliuns francs e per l'onn 2011 6.277 milliuns francs. Quai ha concludì la regenza grischuna.
Las contribuziuns chantunalas ordinarias da l'onn 2001 fin l'onn 2007 han importà tranter 3.8 e 4.3 milliuns francs. La regenza considerescha che l'augment da la contribuziun ordinaria saja adequat. Quest augment sustegn la nova strategia da Grischun vacanzas che vegn realisada en connex cun la refurma currenta dal turissem. In element essenzial da questa strategia è quel che Grischun vacanzas - cun sia preschentaziun activa sin il martgà - avra chanals da vendita per il turissem grischun en differents novs martgads.

Repartì las taxas da la patenta d'alcohol 2009
Dal retgav net da las taxas da la patenta d'alcohol ha la regenza grischuna repartì las contribuziuns per intents d'utilitad publica per l'onn 2009. Las contribuziuns importan en tut 470'000 francs. Resguardadas vegnan circa 30 organisaziuns ed instituziuns caritativas sco er differents projects en il chantun.

Da vischnancas e da regiuns

• Churwalden: La regenza ha approvà la constituziun da la vischnanca da Churwalden dals 14 d'avust 2009.
• Vaz: Il plan d'areal Fadail ch'è vegnì concludì ils 2 da fanadur 2009 da la vischnanca da Vaz vegn approvà.

Contribuziuns chantunalas a differentas instituziuns

• Fundaziun per il gimnasi svizzer da sport a Tavau: Cun resalva da la finanziaziun totala vegn concedì - tenor la nova politica regiunala da la confederaziun (NPR) - in credit da 500'000 francs a la fundaziun per il gimnasi svizzer da sport a Tavau, e quai per engrondir il gimnasi da sport. Plinavant vegn garantida ina contribuziun chantunala dad 84'170 francs.
• Center da persunas attempadas dal Signuradi: Il project da construcziun per substituir l'edifizi dal center da persunas attempadas dal Signuradi a Maiavilla cun 51 letgs da tgira renconuschids vegn approvà. Per il project da construcziun vegn garantida ina contribuziun chantunala da maximalmain 5'710'000 francs.
• Tgira da monuments: Il chantun sa participescha cun totalmain 348'400 francs vi da differents projects da la tgira da monuments. Sustegnidas vegnan la restauraziun da l'intern da la baselgia catolica Son Flurin a Vignogn, la restauraziun da la baselgia evangelica S. Martino a Bondo sco er la renovaziun dal tetg da la Casa a Marca a San Vittore.

Projects da vias
La regenza ha approvà totalmain 6'600'000 francs per construir e per sanar ils suandants trajects da vias:
- via naziunala A28: lavurs d'impressari, sviament da Küblis, traversada dal Schanielatobel
- via dal Bernina: lavurs da construcziun e da cuvrida al passadi da la viafier Li Curt

Gremi: regenza
Funtauna: rg chanzlia chantunala dal Grischun