A chaschun da sia ultima sesida ha la regenza concludì da sustegnair differents projects communals. Contribuziuns chantunalas survegnan tranter auter il project per survegliar la zona da bovas a Brinzauls, la basa tecnica da Mustér sco er la basa principala da Sent.
Da vischnancas e da regiuns
- Brinzauls: La regenza approvescha il project per installar in sistem per survegliar la zona da bovas Caltgeras sin il territori da la vischnanca da Brinzauls. Als custs vegn concedida ina contribuziun chantunala da 171'600 francs.
- Mustér: Per il project "Basa tecnica da Mustér" da la vischnanca da Mustér vegn garantida ina contribuziun da maximalmain 244'200 francs.
- Sent: Il project "Basa principala da Sent" da la vischnanca da Sent vegn subvenziunà cun maximalmain 462'000 francs.
- Fläsch, Maiavilla e Jenins: A las vischnancas da Fläsch, da Maiavilla e da Jenins vegn concedida ina contribuziun totala da 312'700 francs als custs per engrondir e per sanar la serenera da Bogn Ragaz.
- Valragn: La nova constituziun da la vischnanca da Valragn dals 25 da settember 2009 vegn approvada.
- Castrisch: La revisiun parziala da la constituziun communala da la vischnanca da Castrisch, concludida da la radunanza communala ils 18 da settember 2009, vegn approvada.
- Molinis: La revisiun parziala da la constituziun communala da la vischnanca da Molinis, concludida da la radunanza communala ils 26 d'avust 2009, vegn approvada.
- Sent: La revisiun parziala da la constituziun communala da la vischnanca da Sent dals 17 da settember 2009 vegn approvada.
- Spleia: En sia consultaziun a l'uffizi federal da traffic concernent la dumonda da las telefericas Spleia-Tambo SA dals 20 da fanadur 2009 da dar la concessiun tenor il dretg davart las telefericas e d'approvar ils plans per construir e per manar sin il territori da la vischnanca da Spleia ina sutgera da sis "Bodenstafel – Alpetli" (sco remplazzament da dus runals), propona la regenza da dar la concessiun.
Contribuziuns chantunalas a differentas instituziuns
- Institut autalpin da Ftan SA: Cun resalva da la finanziaziun totala vegn concedì a l'institut autalpin Ftan SA in credit da 430'000 francs tenor la nova politica regiunala da la confederaziun (NPR) per sanar ils edifizis. Plinavant vegn garantida ina contribuziun chantunala da 72'386 francs.
Gremi: regenza
Funtauna: rg chanzlia chantunala dal Grischun