La cumissiun predeliberanta dal cussegl grond s'exprima per la fusiun da las vischnancas da Churwalden, da Malix e da Parpan a la nova vischnanca da Churwalden.

En sia missiva dals 23 da zercladur 2009 propona la regenza grischuna al cussegl grond d'approvar la fusiun per il 1. da schaner 2010 da las vischnancas da Churwalden, da Malix e da Parpan a la nova vischnanca da Churwalden. Sut il presidi dal deputà Jakob Barandun ha la cumissiun predeliberanta dal cussegl grond predeliberà la fatschenta per mauns dal cussegl grond. A questa sesida èn stads preschents er il cusseglier guvernativ Martin Schmid e la represchentanza da las vischnancas pertutgadas.
 
Las votantas ed ils votants da Churwalden, da Malix e da Papan han approvà cleramain ils 14 da zercladur 2009 la fusiun da lur vischnancas a la nova vischnanca da Churwalden. La cumissiun predeliberanta ha concludì unanimamain da proponer al cussegl grond d'approvar la fusiun da las vischnancas da Churwalden, da Malix e da Papan e da metter en vigur quest conclus per il 1. da schaner 2010. La cumissiun è persvadida ch'i sa tracta d'ina fusiun fitg utila, da la quala resorta ina vischnanca nova e ferma per il chantun Grischun.
 
Cun questa fusiun tracta il cussegl grond la proxima sessiun da december en tut la terza ed ultima fusiun da vischnancas da l'onn 2009. Ellas tuttas duain entrar en vigur per il 1. da schaner 2010. Uschia dessi – premess ch'il parlament approveschia las fusiuns da Cazas e da Churwalden – per il 1. da schaner 2010 anc 180 vischnancas en il Grischun. Gia il favrer 2009 aveva il cussegl grond approvà la fusiun en la Bregaglia ad ina vischnanca da vallada.


Infurmaziuns:
president da la cumissiun Jakob Barandun, tel. 079 290 60 00


Gremi: cumissiun predeliberanta per la fusiun a la vischnanca da Churwalden
Funtauna: rg cumissiun predeliberanta per la fusiun a la vischnanca da Churwalden