En il rom d'ina acziun naziunala metta il servetsch social per dumondas da dependenza a disposiziun ina purschida da cussegliaziun speziala davart il tema "univers masculin ed alcohol". Umens che vulan reponderar lur consum d'alcohol pon far dumondas durant in'emna sur l'adressa dad e-mail maennerweltalkohol@soa.gr.ch. Il di naziunal davart ils problems d'alcohol infurmescha mintg'onn ils 19 da november davart las grevezzas da persunas cun problems d'alcohol. Quest onn vegn rendì attent a las particularitads dal consum d'alcohol dals umens.

Durant l'emna dals 19 fin ils 26 da november 2009 – en il rom da l'acziun speziala – pon umens interessads, dentant er dunnas, far dumondas a persunas spezialisadas davart il tema dal consum d'alcohol specific dals umens sur l'adressa dad e-mail maennerweltalkohol@soa.gr.ch. Co tegn jau sut controlla l'alcohol? Pertge èsi difficil per umens da reponderar lur consum? Quals avantatgs avess in consum moderà d'alcohol? Nua poss jau survegnir sustegn? Las dunnas ed ils umens interessads survegnan respostas da las persunas spezialisadas sin talas dumondas e sin dumondas sumegliantas sco er cussegls pratics en connex cun l'alcohol ed il mintgadi. La pussaivladad da far dumondas per e-mail duai encuraschar persunas interessadas da duvrar la purschida da cussegliaziun multifara e professiunala ch'è avant maun.

Questa purschida dal servetsch social per dumondas da dependenza a Cuira vegn lantschada en il rom dal di naziunal davart ils problems d'alcohol. Ils 19 da november infurmeschan ils posts spezialisads en l'entira Svizra davart las situaziuns difficilas che persunas cun problems d'alcohol sco er lur confamigliaras e lur confamigliars ston supportar. Quest onn stat il di naziunal sut il motto "univers masculin ed alcohol".

Umens èn spezialmain pertutgads da problems d'alcohol
L'enquista svizra davart la sanadad da l'onn 2007 mussa che umens èn spezialmain pertutgads e pli periclitads che dunnas da problems d'alcohol. Tenor quella han 12.6% dals umens la tendenza da consumar l'alcohol en moda ristgada e nuschaivla. Tar las dunnas èn quai 2.8%. Ils umens cumportan bain in pau dapli alcohol che dunnas, perquai ch'il corp dals umens cuntegna dapli aua per schlunganar l'alcohol bavì. Gist qua è il latsch. L'um baiva memia bler, senza ch'el sa senta sturn. Quai na gida dentant betg ad evitar las consequenzas negativas dal consum d'alcohol.

In discurs cun ina persuna spezialisada po gidar a sviluppar las atgnas fermezzas – sumegliant al trenader da sport che mussa las dretgas tecnicas. L'um emprenda da tegnair meglier sut controlla ses consum d'alcohol. Ulteriuras infurmaziuns davart il tema pon ins consultar sin la pagina d'internet da l'uffizi dal servetsch social chantunal www.soa.gr.ch.


Infurmaziuns:
Andrée Schirtz, manadra dal servetsch social per dumondas da dependenza, uffizi dal servetsch social, tel. 081 257 26 94


Gremi: uffizi dal servetsch social
Funtauna: rg uffizi dal servetsch social