A chaschun da sia ultima sesida ha la regenza grischuna concludì da stgaffir in nov center administrativ regiunal a Tusaun. Otg posts da servetsch chantunals duain vegnir concentrads en in lieu. Ultra da quai ha la regenza deliberà per l'audienza in concept nov per promover l'integraziun da persunas cun impediments en il chantun.

Planisà in nov center administrativ regiunal a Tusaun
Il chantun Grischun planisescha da concentrar a Tusaun ils posts da servetsch chantunals en in lieu. La regenza grischuna ha concludì da stgaffir in nov center administrativ regiunal.
La strategia chantunala d'immobiglias ha la finamira da stgaffir centers regiunals. En il fratemp han tals centers administrativs gia pudì vegnir averts a Landquart, a Glion ed a Roveredo. En la pratica èn els sa cumprovads. Sco proxim vul il chantun ussa stgaffir in center en la vischnanca da Tusaun. Ils otg posts da servetsch chantunals, ch'èn sparpagliads oz en set differents lieus, duain vegnir concentrads en in nov edifizi d'administraziun cun var 40 plazzas da lavur. Tar quests posts da servetsch tutgan biros da l'uffizi da stimaziun, da la controlla da victualias, da la direcziun da construcziun da l'uffizi da construcziun bassa, da l'inspecturat da scola e da scolina, dal servetsch psicologic da scola, da la cussegliaziun da professiun e da carriera cun il center d'infurmaziun professiunala, dal center regiunal per intermediaziun da lavur sco er da la polizia chantunala.
Ils posts da servetsch duain prender alloschi en in edifizi nov ch'è planisà sin l'areal da la veglia basa principala. Quest edifizi pudess vegnir realisà a partir da l'onn 2010, uschia ch'el pudess vegnir retratg l'atun 2011.

Proponì in concept nov per promover l'integraziun da persunas cun impediments
En l'avegnir vul il chantun Grischun reglar da nov la finanziaziun da las purschidas per integrar persunas cun impediments. La regenza grischuna ha prendì enconuschientscha dal sboz per in concept correspundent dal departament d'economia publica e fatgs socials e l'ha deliberà per l'audienza en circuls interessads.
Il concept dal chantun Grischun per promover l'integraziun da persunas cun impediments fixescha, co che l'indemnisaziun da las prestaziuns e co che la planisaziun da las purschidas da las instituziuns per persunas cun impediments duain esser concepidas en l'avegnir. Il motiv è ch'ils chantuns èn responsabels – pervia da la nova concepziun da la gulivaziun da finanzas e da la repartiziun da las incumbensas tranter la confederaziun ed ils chantuns (NGF) – per la finanziaziun da quest sectur e betg pli la confederaziun.
Da nov duai in sistem da finanziaziun che s'orientescha vi da las prestaziuns remplazzar l'indemnisaziun da las prestaziuns vertenta da la confederaziun che s'orientescha vi dal deficit. Il sistem futur sa basa sin il basegn d'assistenza individualmain different dals umans cun impediments. Uschia duain vegnir fixadas tariffas pauschalas per las differentas prestaziuns d'assistenza. La finala definescha il concept las cundiziuns generalas ed ils princips, tenor ils quals il chantun duai concepir concretamain en l'avegnir l'agid instituziunalisà a persunas cun impediments. Quels vegnan concretisads en in emprim pass en collavuraziun cun ils chantuns da la Svizra da l'ost Appenzell dadens, Appenzell dador, Glaruna, Son Gagl, Schaffusa e Turgovia sco er cun il chantun Turitg.

Da vischnancas e da regiuns

• Schlarigna: A la vischnanca da Schlarigna vegn concedida ina contribuziun chantunala da 136'000 francs per las mesiras da regeneraziun tar la palì en il territori da Palüd Chapè.
• Mesauc: A la vischnanca da Mesauc vegn concedida ina contribuziun chantunala da 53'083 francs vi dals custs supplementars da l'engrondiment da la serenera da San Bernardin.
• Vignogn: La revisiun parziala da la constituziun communala da la vischnanca da Vignogn, concludida da la radunanza communala ils 21 da november 2008, vegn approvada.
• Falera: La revisiun da la planisaziun locala vegn approvà cun cundiziuns e cun prescripziuns per l'ulteriura planisaziun. Questa revisiun era vegnida deliberad da la vischnanca da Falera ils 12 da zercladur 2009 per pussibilitar in hotel a l'entrada ost dal vitg da Falera.
• Valragn: La revisiun totala da la planisaziun locala da la vischnanca da Valragn dals 20 da mars 2009 vegn approvada.
• Tumleastga-Mantogna: Il plan per il svilup dal guaud Tumleastga-Mantogna vegn approvà. Quel regla l'utilisaziun futura dal guaud e fixescha las finamiras e las strategias da cultivaziun da la selvicultura a lunga vista.

Contribuziuns chantunalas a differentas instituziuns

• Chasa da persunas attempadas e chasa da tgira da la Val Lumnezia: Il project preliminar per substituir l'edifizi da la chasa da persunas attempadas e da tgira "da casa val lumnezia" tras in nov edifizi a Vella che cumpiglia maximalmain 58 letgs da tgira, che han in dretg da survegnir subvenziuns, vegn approvà. Cun resalva da l'approvaziun definitiva dal project e da la garanzia da la finanziaziun restanta vegn empermessa a l'instituziun responsabla ina contribuziun chantunala da maximalmain 7'000'000 francs.
• Holcim SA: Per renovar respectivamain per engrondir ils binaris da colliaziun da la firma Holcim SA a Vaz sut vegn garantida ina contribuziun chantunala da maximalmain 121'117 francs.

Gremi: regenza
Funtauna: rg chanzlia chantunala dal Grischun