A chaschun da sia ultima sesida ha la regenza grischuna concludì ina revisiun parziala da las ordinaziuns da chatscha e da pestga. Questa revisiun parziala regla da nov l'emissiun da las patentas.

L'emissiun da las patentas da chatscha e da pestga vegn reglada da nov
Il chantun Grischun regla da nov l'emissiun da las patentas da chatscha e da pestga. La regenza grischuna ha approvà la revisiun parziala correspundenta da las ordinaziuns da chatscha e da pestga e las ha messas en vigur per il 1. da schaner 2010.
Nov èsi che a partir da l'onn proxim na vegn l'uffizi da fatgs da polizia e da dretg civil betg pli ad emetter patentas da chatscha e da pestga. Empè da quai duai l'uffizi da chatscha e pestga organisar en il futur l'emissiun da las patentas en moda confurma al basegn ed orientada a la clientella. En quest senn ha l'uffizi er la pussaivladad d'adattar l'emissiun da las patentas als basegns da la clientella che sa midan. Uschia è vegnida tschernida conscientamain ina formulaziun averta en la revisiun parziala. Quella di che las patentas da chatscha e da pestga pon vegnir retratgas tar ils posts ch'èn vegnids inditgads da l'uffizi da chatscha e pestga. Quests posts vegnan publitgads mintgamai en il fegl uffizial dal chantun.

Da vischnancas e da regiuns

• Cauco: A la vischnanca da Cauco vegn garantida ina contribuziun da 12'653 francs als custs supplementars per la renovaziun e per l'engrondiment dal provediment d'aua.
• Mon: A la vischnanca da Mon vegn garantida ina contribuziun dad 8'972 francs als custs supplementars per la renovaziun dal provediment d'aua.
• Seglias: La constituziun da la vischnanca da Seglias dals 14 da settember 2009 vegn approvada.
• Castrisch: La revisiun totala da la planisaziun locala da la vischnanca da Castrisch, concludida ils 24 da mars 2009, vegn approvada.
• Suraua: La revisiun totala da la planisaziun locala da la vischnanca da Suraua dals 26 d'avust 2008 respectivamain dals 31 da mars 2009 vegn approvada.

Contribuziuns chantunalas a differentas instituziuns

• "Bursa d'artistas e d'artists a Thun 2010": Il project "Bursa d'artistas e d'artists a Thun 2010" vegn sustegnì cun ina contribuziun unica da maximalmain 68'000 francs. A la 51. bursa d'artistas e d'artists che ha lieu dals 28 d'avrigl fin ils 2 da matg 2010 a Thun è il chantun Grischun il chantun ospitant.

Projects da vias
La regenza ha approvà totalmain 400'000 francs per construir e per sanar il suandant traject da via:

• via da la Lumnezia: lavurs d'impressari, Glion – Cumbel

Gremi: regenza
Funtauna: rg chanzlia chantunala dal Grischun