Cun il Grischun introducescha in chantun per l'emprima giada la plattafurma dad e-mail IncaMail sco med da communicaziun segir. IncaMail è integrà directamain en l'Outlook e pussibilitescha da nov a differentas autoritads administrativas da trametter e-mails codads u e-mails recumandads. Grazia a la communicaziun electronica segira pon ellas liquidar proceduras administrativas en moda pli svelta e pli efficazia a partir da l'onn 2010. Reglà è l'andament da talas proceduras tenor la "ordinaziun davart la transmissiun electronica en il rom d'ina procedura administrativa". En il rom da questa ordinaziun è la plattafurma d'infurmaziun IncaMail da la Posta gist vegnida admessa sco emprima e fin ussa sco unica tecnologia da plattafurma.

En l'internet pon e-mails betg codads vegnir legids, midads u tschiffads facilmain da terzas persunas. Cun la pussaivladad da spedir e-mails en moda segira e cumprovada serra la Posta questa largia da segirezza cun la plattafurma IncaMail.

Integraziun simpla
L'uffizi d'informatica dal Grischun metta da nov a disposiziun IncaMail, questa plattafurma dad e-mail segira, als posts d'administraziun dal Grischun. A partir dal 1. da schaner 2010 pon ils posts da servetsch chantunals e las dretgiras chantunalas duvrar quest servetsch nov. Cun ina colliaziun segira è la plattafurma colliada directamain cun Exchange ed integrada en la chascha dad e-mails dad Outlook da l'utilisadra e da l'utilisader. Ils custs d'investiziun èn minims. Mess a quint vegn mintga e-mail segir e cumprovabel ch'è vegnì tramess. Cun IncaMail han ils posts d'administraziun a disposiziun in instrument simpel per la communicaziun segira. Sch'i sa tracta d'observar la confidenzialitad u sch'i sa tracta da la segirezza giuridica pon las collavuraturas ed ils collavuraturs spedir documents en e-mails codads e tut tenor basegn en e-mails recumandads cun ina cumprova da spediziun, e quai da mintga plazza da lavur.

E-mail segir conquista las autoritads
Cun l'integraziun dad IncaMail èn las autoritads dal chantun Grischun preparadas per l'avegnir. Gia dapi il cumenzament da l'onn 2008 è en vigur la "ordinaziun davart la transmissiun electronica en il rom d'ina procedura administrativa". Ella regla, co che la correspundenza d'ina procedura administrativa tranter las partidas e las autoritads federalas po vegnir transmessa en moda electronica a norma da la lescha federala respectiva (LFPA; CS 172.021). L'ordinaziun po vegnir applitgada per tut las inoltraziuns areguard il relasch d'ina disposiziun e per la communicaziun da disposiziuns d'ina autoritad. La plattafurma d'infurmaziun IncaMail è gist vegnida renconuschida dal departament federal da finanzas (DFF) sco emprima e fin ussa sco unica tecnologia da plattafurma per la transmissiun electronica da proceduras administrativas.

Proceduras giudizialas a partir dal 1. da schaner 2011
A partir dal 1. da schaner 2011 vegnan ultra da quai differentas dretgiras en tut la Svizra ad esser obligadas d'acceptar e da tractar inoltraziuns electronicas en il rom da process civils e penals sco er da proceduras da scussiun e da concurs. Er qua datti la cundiziun ch'ina plattafurma d'infurmaziun per il traffic segir e cumprovabel dad e-mail stoppia vegnir duvrada per barattar ils documents. In'ordinaziun correspundenta è actualmain en consultaziun tar l'uffizi federal da giustia. En ina procedura gia averta vegni decidì davart l'admissiun dad IncaMail.

Infurmaziuns:
- post da medias da la Posta, tel 058 338 13 07, e-mail: presse@post.ch  
- cusseglier guvernativ dr. Martin Schmid, schef dal departament da finanzas e vischnancas dal Grischun, tel. 081 257 32 01
- Fernando Caduff, vicemanader da l'uffizi d'informatica dal Grischun, tel. 081 257 32 61

Gremi: la Posta / departament da finanzas e vischnancas
Funtauna: rg la Posta / departament da finanzas e vischnancas