Sco part centrala da la refurma dal turissem grischun duai er la finanziaziun dal turissem en il Grischun vegnir concepida da nov. La regenza ha avert la consultaziun correspundenta. Suenter avair examinà differentas alternativas da finanziaziun preschenta ella duas variantas: Cun ina taxa turistica communala armonisada che sa basa sin ina lescha generala chantunala vegn er messa en consultaziun – ultra da la proposta per ina taxa turistica chantunala per tut il Grischun – ina varianta elavurada en detagl.

La refurma dal turissem grischun, cun la quala igl è vegnì cumenzà l'onn 2006, è fin ussa il project il pli grond ed il pli impurtant en connex cun las structuras turisticas dal Grischun. En tut las regiuns turisticas dal chantun vegnan actualmain furmadas novas structuras. Perquai ch'il giast na s'orientescha betg vi da cunfins communals, mabain vi da spazis da divertiment e vi da marcas turisticas, vegnan las passa 90 organisaziuns turisticas unidas ad organisaziuns per la gestiun da destinaziuns (OGD) efficazias ed ad organisaziuns turisticas regiunalas (OTReg). Cun ina clera repartiziun da las incumbensas e cun s'orientar a novs giasts duai il turissem grischun daventar pli cumpetitiv. La refurma dal turissem grischun dat la direcziun per ch'il turissem sco motor principal da l'economia publica dal Grischun possia franar il trend negativ e profitar dal potenzial da creschientscha dal turissem internaziunal.

Nova finanziaziun sco element central da la refurma
In sistem da finanziaziun solid e persistent è ina part centrala per realisar la refurma dal turissem cun success ed en moda stabila a lunga vista. Uschia vegni garantì ch'il svilup turistic e ch'il marketing turistic intermanaschial vegnian finanziads sur ils cunfins da las vischnancas or. Cun la taxa turistica vegnan tut las parts che profitan da la valurisaziun turistica integradas en la finanziaziun. Ils meds finanzials che vegnan generads uschia vegnan mess a disposiziun a las organisaziuns turisticas. Las organisaziuns per la gestiun da destinaziuns (OGD) e las organisaziuns turisticas regiunalas (OTReg) surpiglian en quest connex l'incumbensa d'elavurar ils martgads principals, Grischun vacanzas tala d'elavurar ils martgads che ston anc vegnir preparads e dals martgads futurs.

Duas variantas per la nova finanziaziun dal turissem
Suenter avair examinà differentas alternativas metta la regenza grischuna en consultaziun dus sbozs da leschas concernent la nova finanziaziun dal turissem planisada. Passa tschient differentas leschas communalas (taxas da cura e taxas per promover il turissem) duain vegnir remplazzadas u tras ina taxa turistica chantunala (lescha davart la finanziaziun da las organisaziuns turisticas, LFOT) u tras taxas turisticas communalas tenor ina lescha generala chantunala (lescha davart l'armonisaziun da la finanziaziun dal turissem, LAFT).

Taxa turistica chantunala (TTC)
La taxa turistica chantunala sa basa sin il gudogn respectivamain sin la valurisaziun che las profitadras ed ils profitaders realiseschan directamain u indirectamain cun il turissem. Ella sa drizza tenor la valurisaziun turistica d'ina interpresa e vegn graduada tenor la branscha, tenor la regiun e tenor la grondezza da l'interpresa. Perquai ch'il circul dals subjects ch'èn obligads da pajar la taxa vegn extendì sin tut il chantun e perquai ch'el cumpiglia er las abitaziuns da vacanzas e las abitaziuns secundaras, s'augmentan ils meds finanzials che stattan a disposiziun mintg'onn per il svilup turistic e per il marketing turistic da 51.5 milliuns francs a circa 67.7 milliuns francs. Cun la nova finanziaziun dal turissem resta la responsabladad per il svilup turistic en mauns da las vischnancas. Ils retgavs da la taxa turistica chantunala returnan mintgamai en la regiun turistica respectiva.

Taxas turisticas communalas armonisadas (LAFT)
Sco varianta da la taxa turistica chantunala metta la lescha davart l'armonisaziun da la finanziaziun dal turissem il rom per introducir taxas turisticas communalas. En quella vegni proponì che vischnancas pon sa participar voluntarmain ad in'organisaziun turistica e surdar a quella la promoziun dal turissem. Uschia s'obligheschan ellas il medem mument da munir l'organisaziun turistica cun meds finanzials "adequats". Sche las finamiras da la refurma dal turissem grischun vegnan periclitadas u impedidas en ina tscherta regiun, po la regenza procurar ch'ina vischnanca fetschia part d'ina organisaziun turistica. L'autezza da las tariffas da la taxa resguarda – sco en cas da la taxa turistica chantunala – il gudogn turistic direct ed indirect dals subjects ch'èn obligads da pajar la taxa. Sch'ina vischnanca n'introducescha betg ina taxa turistica communala, sto ella finanziar l'organisaziun turistica or da meds fiscals generals u or d'ulteriurs meds finanzials.

L'ulteriur urari
La consultaziun dura fin la fin da mars 2010. Alura vegnan evaluadas tut las respostas. Eventualmain ston vegnir sclerids ulteriurs detagls. Ulteriuras infurmaziuns davart la consultaziun e davart ils dus sbozs da leschas stattan a disposiziun sut www.dvs.gr.ch (rubrica "temas/projects") u sut www.tourismusabgabe.ch.


Infurmaziuns:
- Hansjörg Trachsel, president da la regenza e schef dal departament d'economia publica e fatgs socials, tel. 081 257 23 01
- Eugen Arpagaus, manader da l'uffizi per economia e turissem dal Grischun, tel. 081 257 23 77 u 079 256 93 94


Gremi: regenza
Funtauna: rg chanzlia chantunala dal Grischun