La cumissiun predeliberanta dal cussegl grond è sa fatschentada cun il rapport davart la strategia d'immobiglias dal chantun e davart sia realisaziun a Cuira. En quai che concerna la realisaziun da las variantas s'exprima ina maioritad da la cumissiun per il project "sinergia".

Per la proxima sessiun da december ha la regenza preschentà al cussegl grond il rapport davart la strategia d'immobiglias dal chantun – realisaziun da la strategia a Cuira. En preschientscha da cusseglier guvernativ Stefan Engler ha ina cumissiun dal cussegl grond che vegn presidiada dal deputà Ernst Casty predeliberà il rapport per mauns dal parlament.
La finamira da la strategia d'immobiglias dal chantun è quella da realisar nov centers chantunalas ch'èn repartids en l'entir chantun. En quest connex èn vegnidas fatgas dacurt fusiuns a Landquart, a Glion ed a Roveredo ch'èn gia sa cumprovadas. Er a Cuira datti in potenzial d'optimaziun. Las bleras plazzas da lavur ed ils posts da servetsch sco er ils tschintg departaments sa chattan a passa 40 lieus. Quai chaschuna numerusas situaziuns cun localitads che n'èn betg cuntentaivlas. Ultra da quai chaschuna quai er custs inutils.
La regenza preschenta ussa al cussegl grond trais variantas per realisar ina strategia d'immobiglias a Cuira: il project "sinergia" che prevesa in grond edifizi d'administraziun cun var 725 plazzas da lavur; ina "surbajegiada modulara tenor prioritads" che prevesa in proceder pass per pass cun trais novas construcziuns graduadas areguard il temp; il "mantegniment da la situaziun actuala cun tschertas optimaziuns". Las construcziuns novas tenor las duas emprimas variantas duessan vegnir realisadas sin la parcella Ringstrasse/caserna al vest da Cuira.
Suenter ina discussiun detagliada è la cumissiun predeliberanta dal cussegl grond vegnida a la conclusiun che la finamira da la strategia d'immobiglias per la plazza da Cuira sto esser quella da reunir las plazzas da lavur da l'administraziun chantunala. Pervia da quai è ella s'exprimida per gronda part cunter il mantegniment da la situaziun actuala. Areguard la realisaziun da questa strategia ha la maioritad da la cumissiun alura votà per il project "sinergia" ch'ella resguarda sco pli economic. Ussa èsi chaussa dal cussegl grond da concluder tge strategia ch'el vul recumandar a la regenza da persequitar vinavant.


Infurmaziuns:
president da la cumissiun Ernst Casty, tel. 079 445 48 01


Gremi: cumissiun predeliberanta per il rapport davart la strategia d'immobiglias dal chantun
Funtauna: rg cumissiun predeliberanta per il rapport davart la strategia d'immobiglias dal chantun