En il chantun Grischun duai vegnir lantschà a partir da l'onn 2010 in program per la diagnosa tempriva dal cancer dal sain. Per pudair crear la basa legala per realisar l'uschenumnà program per il screening mammografic, sto vegnir adattada la lescha davart l'assicuranza da malsauns e la reducziun da las premias. La regenza grischuna ha deliberà la missiva correspundenta per mauns dal cussegl grond. Il parlament vegn a tractar questa fatschenta en la sessiun d'avust.

En Svizra è il cancer dal sain la malsogna da cancer lunschor la pli frequenta e la raschun da la mort che vegn chaschunada dal cancer la pli usitada tar las dunnas. Annualmain survegnan circa 5'300 dunnas cancer, passa 1'350 moran pervia dal cancer. Sin basa da las enconuschientschas actualas ston ins partir dal fatg che la diagnosa tempriva dal cancer dal sain cun agid da la mammografia è ina da las paucas metodas per diagnostitgar a temp il cancer, las qualas pon sbassar cumprovadamain la mortalitad. La premissa è che la mammografia vegnia fatga en il rom da programs da screening organisads, cun garanzia da la qualitad.
La regenza è perquai da l'avis ch'in tal program stoppia vegnir introducì er en il chantun Grischun. Igl è planisà da surdar ad in'organisaziun ina incarica da prestaziun per realisar il screening mammografic en il chantun. Per surdar questa incarica èsi previs da far ina publicaziun uffiziala. L'organisaziun sto ademplir in catalog d'incumbensas ch'è vegnì definì ordavant e sto observar las prescripziuns da la confederaziun. La finamira è quella da pudair lantschar l'onn 2010 il program.
La gruppa en mira dals screenings mammografics èn dunnas en la vegliadetgna da 50 fin 69 onns, perquai che la ristga da survegnir cancer dal sain è la pli gronda en questa vegliadetgna. Las assicuranzas da malsauns ston surpigliar ils custs directs per la prestaziun tecnica da la mammografia sco er per la prestaziun medicinala. Il chantun finanziescha ils custs che na vegnan betg surpigliads da las cassas da malsauns, vul dir ils custs per la logistica dal program e per il manaschament da la qualitad sco er ils custs per controllar l'efficacitad da l'entir program. Per quest intent fa il chantun quint cun custs en la dimensiun da 300'000 fin 400'000 francs per onn. Per obtegnair ina gronda participaziun, prevesa la regenza da metter a disposiziun en il Grischun dal nord ed en il Grischun dal sid mintgamai almain in institut da radiologia per il screening mammografic. L'ospital chantunal a Curia, il center da diagnosa Belmont a Cuira e l'ospital da Samedan èn gia sa declerads pronts da participar.

Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01 (cuntanschibla a partir da las 13.00)

Gremi: regenza
Funtauna: rg chanzlia chantunala dal Grischun