Il rapport grischun da famiglia ch'è vegnì deliberà avant dus onns dal cussegl grond recumonda da proteger meglier las dunnas ed ils umens che han uffants u che giavischan uffants. Ina da las mesiras proponidas è la meglra cumpatibilitad da la famiglia e da la professiun. La tgira d'uffants ordaifer la famiglia chatta per part pauca acceptanza en il Grischun. Mammas e babs che dumondan ils servetschs da canortas d'uffants u d'autras structuras dal di per lur uffants, vegnan crititgads. I vegn emblidà che adina dapli famiglias èn dependentas da questas purschidas, perquai ch'ina suletta paja na tanscha betg per nutrir l'entira famiglia. En intginas valladas na datti er insumma nagina pussaivladad da laschar tgirar ils uffants ordaifer la famiglia. Las instituziuns existentas vegnan confruntadas cun ina dumonda creschenta. La gronda part da las canortas d'uffants han glistas da spetga.

Ensemen cun l'autura Susanna Fanzun e cun la televisiun rumantscha ha il departament d'educaziun, cultura e protecziun da l'ambient dal Grischun (DECA) respectivamain il post da stab per l'egualitad da las schanzas producì in DVD che cuntegna dus films documentars e material accumpagnant. Ils dus films illustreschan la cumpatibilitad da la famiglia e da la professiun. Ils films èn en lingua rumantscha cun suttitels tudestgs.

Ils films documentars preschentan per l'ina il mintgadi en la canorta d'uffants pitschens Neugut a Landquart, per l'autra las structuras dal di da la scola primara da S-chanf ch'èn vegnidas creadas cun meds simpels. A pled vegnan geniturs, tattas e tats, politicras e politichers, manadras e manaders d'ina interpresa, ma cunzunt er ils uffants sezs. Uschia sa mussi ch'i dat ina vasta paletta da pussaivladads per ils geniturs da cumbinar la famiglia e la professiun. Entant ch'in dals pèrs surpiglia mintgamai la mesadad da las incumbensas, è la mamma cun in'activitad da gudogn a temp cumplain che educhescha suletta ses trais uffants en la vegliadetgna da scola cuntenta ch'i dat in agid da far pensums a scola. Declerà vegn la responsabladad e l'engaschament da la patruna u dal patrun, las experientschas da cussegliera guvernativa Eveline Widmer-Schlumpf cun ina rait famigliara che funcziuna bain u las visiuns da la politicra da furmaziun e cussegliera naziunala da la PS Jacqueline Fehr. Sco giast spezial sa preschenta il cabarettist Flurin Caviezel cun sia chanzun "Laider, laider nai, dänn bin i nit dahai".

Il DVD "Co che la famiglia e la professiun sa laschan cumbinar" vul gidar a lantschar discussiuns davart la cumpatibilitad da la famiglia e da la professiun e davart las numerusas pussaivladads d'infurmaziun.

Vernissascha a Cuira
A la vernissascha da glindesdi, ils 22 da zercladur, en l'aula da la chasa da scola Montalin a Cuira vegnan mussads extracts dal DVD e commentads da l'autura Susanna Fanzun. Ultra da quai discurra cusseglier guvernativ Claudio Lardi, schef dal departament d'educaziun, cultura e protecziun da l'ambient. A la discussiun al podium "Uffants èn er chaussa dals umens" sa participeschan dus babs, il manader d'ina canorta d'uffants a Cuira sco er in psicolog.

Vernissascha dal DVD "Co che la famiglia e la professiun sa laschan cumbinar" cun discussiun al podium "Uffants èn er chaussa dals umens" e cun apero. La tgira d'uffants è organisada.
Glindesdi, ils 22 da zercladur, da las 17.00 fin las 19.30
Aula da la chasa da scola Montalin, Splügenstrasse 4 a Cuira

Il DVD po vegnir retratg gratuitamain tar il post da stab per l'egualitad da las schanzas, Loestrasse 37, 7000 Cuira, tel. 081 257 35 70 u e-mail: info@chancengleichheit.gr.ch

Infurmaziuns:
Silvia Hofmann, lic.fil.MA, manadra dal post da stab per l'egualitad da las schanzas, tel. 081 257 35 70 u Silvia.Hofmann@stagl.gr.ch

Gremi: post da stab per l'egualitad da las schanzas
Funtauna: rg post da stab per l'egualitad da las schanzas