La regenza grischuna ha recurrì tar il tribunal federal cunter la sentenzia da la dretgira administrativa dal Grischun concernent la taglia sin donaziuns respectivamain la taglia sin l'ierta. En quest recurs propona la regenza al tribunal federal d'annullar la sentenzia da la dretgira administrativa u - cas cuntrari - da returnar la chaussa a l'instanza precedenta per giuditgar da nov la situaziun.
En il Grischun èn per il 1. da schaner 2008 las descendentas ed ils descendents (uffants, biadias e biadis e.u.v.) sco er ils uffants figliasters ed ils uffants confidads vegnids liberads da la taglia sin l'ierta. Per iertas anticipadas ch'èn vegnidas pajadas avant questa data e che n'èn anc betg vegnidas suttamessas a la taglia fin ussa, ha il legislatur previs l'imposiziun da taglia a partir da l'entrada en vigur da la revisiun da la lescha.
En sia sentenzia dals 12 da matg 2009 ha la dretgira administrativa decidì ch'i manchia ina basa legala per suttametter a la taglia las iertas anticipadas tenor il dretg vegl.
Suenter avair analisà la situaziun dals fatgs e dal dretg ha la regenza decidì da recurrer tar il tribunal federal cunter la sentenzia da la dretgira administrativa. Tenor la regenza n'ha la dretgira administrativa betg tegnì quint da la clera voluntad dal cussegl grond. Sin fundament da la sentenzia contestada pudess il chantun perder taglias sin l'ierta d'in import da circa 30 milliuns francs.

Infurmaziuns:
- cusseglier guvernativ dr. Martin Schmid, schef dal departament da finanzas e vischnancas, tel. 081 257 32 01
- Toni Hess, vicemanader da l'administraziun da taglia, tel. 081 257 33 26

Gremi: regenza
Funtauna: rg chanzlia chantunala dal Grischun