Ils onns passads èn vegnids fatgs progress marcants areguard l'effizienza energetica en il sectur da la construcziun auta. Ina chasa moderna d'ina famiglia cun il standard da MINERGIE-P per exempel dovra oz circa 15 kWh energia per m² ed onn. In edifizi vegl percunter dovra 150 fin 275 ed in edifizi nov tenor la norma SIA 55 fin 100 kWh per m² ed onn. Quest fatg è stà la raschun per la cumissiun dal cussegl grond per ambient, traffic ed energia (CATE) da sa perfecziunar sin il champ da la politica d'energia resp. dal construir sut l'aspect da l'effizienza energetica. Uschia ha ella envidà ad in'occurrenza d'in mez di, nua ch'ella è sa laschada infurmar da differents referents davart il stadi il pli actual da la tecnica da construcziun en il sectur da l'energia. Insch. dipl. Helmut Krapmeier da l'institut d'energia dal Vorarlberg ha referì davart il tema "politica d'energia en il Vorarlberg - pretensiuns e realitad", dr. oec. HSG Michael Zindel e dipl. arch. STS SIA Michael Schumacher davart il tema "planisaziun integrala sco factur da success per construir sut l'aspect da l'effizienza energetica - experientschas dal Grischun" e Josias F. Gasser davart il tema "10 onns experientscha cun chasas passivas e cun la valurisaziun en las regiuns - reflexiuns davart impuls per l'economia publica". En quest connex èsi cunzunt sa mussà ch'igl è - a curta vista - bain pli char da construir sut l'aspect da l'effizienza energetica che da construir en moda commerziala, ch'i sa tracta dentant a lunga vista d'ina investiziun lucrativa, forsa schizunt indispensabla, sch'ins dat in sguard sin ils carburants fossils che vegnan ad esser exaurids in bel di. Uschia èsi er stà in giavisch da tut ils referents da sensibilisar la societad per quest tema e da metter a disposiziun - cun agid da la politica - las cundiziuns generalas necessarias per promover il construir sut l'aspect da l'effizienza energetica, uschia che questa moda da construir daventa il standard.
Cun questas novas enconuschientschas è la CATE gia preparada bain per tractar la revisiun da la lescha d'energia dal chantun Grischun en il cussegl grond. Questa tractativa è previsa per la sessiun d'avrigl 2010.

Infurmaziuns:
Christoph Jaag, president da la cumissiun per ambient, traffic ed energia
tel. 081 330 44 14

Gremi: cumissiun per ambient, traffic ed energia
Funtauna: rg cumissiun per ambient, traffic ed energia