En la sessiun da favrer 2009 tracta il cussegl grond tranter auter il rapport da polizia 2010. In da ses puncts principals è l'augment en etappas da l'effectiv dal persunal da la polizia chantunala sur plirs onns per totalmain 43 plazzas.
En dus dis da sesida ha la cumissiun per giustia e segirezza predeliberà la missiva da la regenza per mauns dal cussegl grond, e quai en preschientscha da la cussegliera guvernativa Barbara Janom Steiner e dal cumandant da la polizia chantunala Markus Reinhardt. Suenter ina discussiun intensiva e detagliada è la cumissiun da princip perencletga cun il rapport. L'opiniun da la cumissiun divergescha però per part areguard il dumber da las plazzas novas ch'èn necessarias tar la polizia chantunala. Per la cumissiun è l'augment da l'effectiv per 43 plazzas cumprovà mo per part. En in emprim pass approvescha la cumissiun in augment en etappas dal persunal da la polizia chantunala en la dimensiun da 30 plazzas (10 plazzas per l'onn 2009, 10 plazzas per l'onn 2010 e 10 plazzas per l'onn 2011) sco er 3 plazzas supplementaras per il sistem naziunal da func POLYCOM. Davart in ulteriur augment dal persunal da la polizia chantunala duai vegnir discutà e decidì pli tard suenter ina pausa pli lunga e cur ch'igl èn avant maun las basas statisticas correspundentas per prender ina decisiun. Plinavant beneventa la cumissiun l'idea da la regenza d'introducir ina polizia unitara en il Grischun (eventualmain cun excepziuns).

Gremi: cumissiun per giustia e segirezza
Funtauna: rg cumissiun per giustia e segirezza