Quests dis èn vegnids tramess ils quints da taglia provisorics da la confederaziun, dal chantun e d'ina part da las vischnancas per l'onn fiscal 2008. La summa minimala dals quints per la confederaziun e per il chantun è vegnida fixada sco ils onns precedents a 300.- francs. En quels cas che la summa ch'è debitada provisoricamain è pli bassa, na vegni betg tramess in quint provisoric.

Il quint da taglia provisoric 2008 sa basa sin ils ultims facturs da taglia registrads. En blers cas èn quai las entradas suttamessas a la taglia sco er la facultad da l'onn fiscal 2007; en singuls cas pon quai er esser ils facturs da l'onn fiscal 2006. Sche las entradas suttamessas a la taglia e sche la facultad da l'onn precedent èn bler pli autas ch'ils facturs ch'èn da spetgar per l'onn fiscal 2008, pon las pajataglias ed ils pajataglias pretender en scrit in quint pli bass, e quai tar l'uffizi communal da taglia.

Per il 1. da schaner 2008 è entrada en vigur ina vasta revisiun parziala da la lescha da taglia ed ultra da quai è il pe da taglia chantunal vegnì reducì da 105% a 100%. Quai ha cunzunt consequenzas per il quint da taglia provisoric dals conjugals. Ils facturs da l'onn fiscal 2007 èn vegnids mess a quint cun la nova tariffa per l'onn fiscal 2008, e quai cun l'effect ch'il quint da taglia è bler pli bass che l'onn precedent.
Als conjugals senza uffants vegn messa a quint ina summa in pau memia bassa, sche lur entradas n'èn betg creschidas l'onn 2008 en cumparegliaziun cun l'onn precedent. Quai è la consequenza dal fatg che la deducziun da famiglia è vegnida stritgada en la revisiun parziala 2008.

Las pajataglias ed ils pajataglias cun ina facultad suttamessa a la taglia ch'è fitg gronda vegnan a constatar che la taxa speziala sin la facultad na cumpara betg pli sin il quint da taglia. Questa taglia speziala è vegnida abolida per il 1. da schaner 2008.

Cun ils quints da taglia da las vischnancas vegnan per regla er incassadas las taxas communalas, p.ex. la taxa da pumpiers, la taglia per chasada, la taxa fundamentala sin ruments e.u.v. L'evaluaziun posteriura da la spediziun dals quints ha mussà che questas taxas n'èn betg vegnidas messas a quint en differentas vischnancas pervia dal sbagl da program d'in partenari d'informatica extern. Nua che las taxas cuntanschan ina summa da 300.- francs, duai vegnir tramess in quint provisoric curregì cun la spediziun dals quints dals 17 da favrer. Las vischnancas vegnan a stuair decider, sch'ellas vulan trametter in quint provisoric er per summas pli pitschnas u sch'ellas vulan retrair questas summas pli tard cun il quint definitiv.

Gremi: administraziun da taglia dal Grischun
Funtauna: rg administraziun da taglia dal Grischun