La cuminanza da lavur da las regiuns alpinas (ARGE ALP) fa ina concurrenza per chattar la meglra chanzun davart il tema "Alps". Anc fin il 1. da mars 2009 pon musicistas giuvnas e musicists giuvens dals pajais commembers da la ARGE ALP inoltrar lur contribuziuns musicalas. Els pon gudagnar in premi da fin 15'000 euros.

Cun surdar in premi da musica vul la ARGE ALP, che vegn presidiada actualmain dal chantun Grischun, metter novs accents. Il premi da la ARGE ALP 2009 ha la finamira da promover musicistas giuvnas e musicists giuvens dal territori alpin e da dar ad ellas ed ad els la pussaivladad da cumprovar lur abilitads en ina concurrenza. La concurrenza da musica ARGE ALP Sound 2009 duai encuraschar umans giuvens da sa fatschentar en moda creativa cun lur spazi da viver e cun il tema "Alps".
Il termin per inoltrar las contribuziuns dura anc fin il 1. da mars 2009. Persunas interessadas pon chargiar lur contribuziuns musicalas a partir d'immediat directamain en furma electronica sin la pagina d'internet www.argealpsound.org e sa participar uschia a la concurrenza. Sin questa pagina d'internet chattan ellas er tut las infurmaziuns impurtantas e las cundiziuns da participaziun detagliadas.

Premi da fin 15'000 euros
Las victuras ed ils victurs da la concurrenza survegnan in premi da fin 15'000 euros en furma d'in bon per equipament da musica u per ils custs da producziun d'in disc cumpact. La clav da repartiziun vegn a vegnir fixada d'ina giuria internaziunala. La surdada dal premi ha lieu il zercladur 2009 a Flem a chaschun da la conferenza da las scheffas e dals schefs da las regenzas da la ARGE ALP. Ad in pèr finalistas e finalists vuless la ARGE ALP ultra da quai dar la pussaivladad da sa preschentar a festivals che han lieu en ses territori. Gia han in pèr organisaturas ed organisaturs demussà lur interess vi d'ina collavuraziun, uschia per exempel l'Openair Lumnezia SA, l'Openair rockamweier (Son  Gagl) sco er l'organisatur da la festa per l'avertura dal festival da Salzburg.
Da la ARGE ALP, ch'è vegnida fundada l'onn 1972, fan part ils stadis federativs austriacs Tirol, Salzburg e Vorarlberg, las provinzas autonomas talianas Bulsaun-Tirol dal sid e Trento sco er la regiun taliana Lumbardia, il stadi liber tudestg da la Baviera ed ils chantuns svizzers Tessin, Son Gagl e Grischun. La finamira da la ARGE ALP è quella da tractar - en ina collavuraziun transcunfinala - problems cuminaivels e giavischs dals pajais commembers, d'approfundar la conscienza da la responsabladad communabla per il spazi da viver alpin, da promover ils contacts tranter la populaziun e da rinforzar la posiziun dals pajais, da las regiuns, da las provinzas e dals chantuns.

Gremi: Chanzlia chantunala dal Grischun
Funtauna: rg chanzlia chantunala dal Grischun