La regenza grischuna ha mess en vigur retroactivamain per il 1. da schaner 2008 la revisiun parziala da la lescha chantunala da taglia dals 21 d'october 2008. Questa revisiun parziala serva en emprima lingia ad adattar al dretg federal il sistem per diminuir l'imposiziun economica dubla da taglia da la societad anonima e da l'acziunaria resp. da l'acziunari. Plinavant vegnan midadas las disposiziuns davart las facilitaziuns fiscalas per domiciliar interpresas novas u per mantegnair interpresas existentas, e quai en quel senn che dischavantatgs dal lieu pon vegnir eliminads. La finala vegn la cumpetenza per renunziar excepziunalmain ad ina pretensiun da taglia, l'uschenumnà relasch da taglia, surdada a la regenza per imports da passa 50'000 francs.
Il cussegl grond aveva approvà las midadas da la lescha da taglia ils 21 d'october 2008. Cunter questa revisiun parziala n'eri betg vegnì fatg in referendum.

Da vischnancas e da regiuns
Seglias: La regenza approvescha la revisiun parziala da la constituziun communala da la vischnanca da Seglias dals 19 da settember 2007.
Vaz: La revisiun parziala da la planisaziun locala Fadail/Bergwald da la vischnanca da Vaz, concludida il 1. da zercladur 2008, vegn approvada cun ordinaziuns.
Lavin: La revisiun parziala da la lescha da construcziun da la vischnanca da Lavin, concludida ils 10 da zercladur 2008 ed ils 9 da settember 2008, vegn approvada.

Contribuziuns chantunalas a differentas instituziuns
Fundaziun "Science et Cité / scienza e dialog": Il project "basecamp 2009 Grischun " da la fundaziun "Science et Cité / scienza e dialog", che ha lieu dals 11 fin ils 15 da zercladur 2009 a Cuira, vegn sustegnì cun ina garanzia da deficit da maximalmain 100'000 francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun