Er en dumondas da la sanadad e da la malsogna n'èn las dunnas ed ils umens betg eguals. En il champ da perscrutaziun da la medischina tenor las schlattainas èn avant maun enconuschientschas actualas, las qualas vegnan fatgas accessiblas a la publicitad en furma d'ina nova documentaziun.
Ils cors da las dunnas vegnan bain "adurads", dentant main savens salvads. Perquai è oz la raschun da mort la pli frequenta tar las dunnas malsognas dal cor e da la circulaziun. Er medicaments pon avair in effect different per umens e per dunnas, perquai che las enconuschientschas davart ils medicaments e davart las terapias sa basan sin probands masculins ch'èn a la mesadad da lur vita. Dunnas ed umens pateschan tuttina savens da disturbis psichics. Il dumber da las diagnosas da tals disturbis variescha dentant tranter umens e dunnas ed ils disturbis vegnan tractads en moda differenta tut tenor schlattaina. Pertutgant la sanadad e las malsognas sco er pertutgant la prevenziun ed il tractament datti differenzas tranter las dunnas ed ils umens. Sche quellas differenzas vegnissan resguardadas, pudess vegnir augmentada la qualitad en ils programs da prevenziun ed en la medischina.
Persunas che fan perscrutaziuns e che tgiran, medias e medis sco er persunas ch'èn responsablas per la cussegliaziun e per la lavur da prevenziun duessan cumplettar lur enconuschientschas davart las differenzas specificas tranter umens e dunnas. Ina documentaziun metta a disposiziun gratuitamain a las spezialistas ed als spezialists, a la politica (da sanadad) ed ad in public interessà ils referats da la retscha d'occurrenzas transcunfinala "Sanadad feminina - masculina", ch'è vegnida organisada da tschintg posts spezialisads per l'egualitad.
A la realisaziun dal project èn sa participads il post da stab per l'egualitad da las schanzas dal chantun Grischun, il post da stab per l'egualitad da las schanzas dal Principadi da Liechtenstein, il "Frauenreferat" da la regenza dal Vorarlberg, il post spezialisà per famiglias e per egualitad dal chantun Appenzell dador ed il center da cumpetenza per integraziun, per egualitad e per projects dal chantun Son Gagl.

La documentaziun "Sanadad feminina - masculina" po vegnir retratga gratuitamain dal post da stab per l'egualitad da las schanzas
Loestrasse 37
7000 Cuira
mail : info@chancengleichheit.gr.ch
tel. : 081 257 35 70

Gremi: post da stab per l'egualitad da las schanzas
Funtauna: rg post da stab per l'egualitad da las schanzas