Il chantun Grischun adatta sias regulaziuns legalas davart il
provediment d'electricitad a las novas directivas da la confederaziun.
La regenza grischuna ha deliberà la missiva correspundenta tar il
relasch d'ina lescha davart il provediment d'electricitad dal chantun
Grischun. La finamira è quella da stgaffir ina legislaziun effizienta
per exequir las incumbensas che vegnan surdadas da la confederaziun als
chantuns. Ultra da quai duain tut las disposiziuns dal sectur dal
provediment d'electricitad vegnir reunidas en ina lescha. La nova lescha
ha l'intent da proveder il territori chantunal en moda segira, economica
e durabla cun electricitad. Il cussegl grond vegn a tractar la
fatschenta en la sessiun d'avrigl.
Ils 23 da mars 2007 han las chombras federalas deliberà la lescha
davart il provediment d'electricitad. Questa lescha regla il provediment
d'electricitad svizzer ed è entrada en vigur bunamain dal tuttafatg il
1. da schaner 2008. Excepziuns èn las disposiziuns davart il dretg
d'access a la rait per consumentas grondas e per consuments gronds sco
er l'indemnisaziun per cuvrir ils custs da la furniziun d'electricitad
che vegn producida cun energias regenerablas. Questas disposiziuns èn
entradas en vigur il 1. da schaner 2009. La lescha federala davart il
provediment d'electricitad deleghescha differentas incumbensas als
chantuns. Per exequir questas incumbensas èsi necessari da relaschar ina
legislaziun executiva chantunala che regla ils suandants secturs:
- designar ils territoris da provediment;
- far valair la garanzia da colliaziun en cas da dispita;
- disponer la colliaziun da consumentas finalas e da consuments
finals ordaifer il territori da provediment;
- relaschar disposiziuns davart colliaziuns ordaifer la zona da
construcziun sco er davart ils custs da talas, sche quels na vegnan betg
reglads dal legislatur federal;
- reducir differenzas sproporziunadas tranter las tariffas per
utilisar las raits.
La lescha davart il provediment d'electricitad dal chantun Grischun
duai entrar en vigur il 1. d'avust 2009.
Gremi: regenza
Funtauna: rg chanzlia chantunala dal Grischun