Dumengia, ils 17 da matg 2009, vegni votà davart ils projects chantunals: revisiun parziala da la constituziun chantunala (detretschament da las incumbensas giudizialas), iniziativa chantunala dal pievel "iniziativa.d'etica" e cuntraproposta dal cussegl grond (revisiun parziala da la lescha davart las scolas popularas dal chantun Grischun: "model 1 + 1"). Quai ha concludì la regenza grischuna.
Sin plaun federal vegni votà ils 17 da matg 2009 davart il conclus federal dals 3 d'october 2008 "In futur cun la medischina cumplementara" (cuntraproject tar l'iniziativa dal pievel "Gea a la medischina cumplementara" ch'è vegnida retratga) e davart il conclus federal dals 13 da zercladur 2008 davart l'approvaziun e la realisaziun dal barat da notas tranter la Svizra e la communitad europeica concernent la surpigliada da l'ordinaziun davart ils passaports ed ils documents da viadi biometrics.

L'ordinaziun per il svilup economic vegn adattada
La regenza grischuna ha approvà e mess en vigur per il 1. da mars 2009 la revisiun parziala da l'ordinaziun per promover il svilup economic en il chantun Grischun. Da nov pon las autoritads permetter in cumenzament anticipà da las lavurs u da la construcziun, sche la decisiun davart la concessiun d'in pajament da promoziun na po excepziunalmain betg vegnir prendida ordavant.
Cun elavurar differents cas da promoziun èsi vegnì constatà l'onn passà ch'il chantun possia decider en cas singuls, sch'el duaja - pir suenter il cumenzament da la construcziun u da las lavurs - promover tscherts projects, perquai che per in giudicament definitiv manchian anc ils documents necessaris. En tals cas excepziunals duain las autoritads perquai pudair dar liber a las petentas ed als petents anticipadamain las lavurs u la construcziun, senza crear dentant in pregiudizi per la concessiun d'in pajament da promoziun.

Da vischnancas e da regiuns
Engiadin'ota: La regenza ha approvà cun ina precisaziun il plan directiv regiunal "construcziun d'abitaziuns secundaras" ch'è vegnì concludì da la regiun da l'Engiadin'ota. La precisaziun concerna la disposiziun excepziunala, tenor la quala ils projects d'abitaziuns secundaras ch'èn d'in interess predominant per l'economia publica duain vegnir deliberads da la contingentaziun. La regenza constatescha che quest privilegi duaja sa referir exclusivamain a projects che van a favur d'interpresas d'alloschament persistentas u ch'èn en l'interess d'emprimas abitaziuns favuraivlas. Il plan directiv regiunal va enavos sin l'onn 2005, cur che l'iniziativa dal pievel davart la restricziun da construir abitaziuns secundaras en l'Engiadin'ota è vegnida acceptada.
Churwalden: La revisiun parziala da la lescha da construcziun, concludida ils 9 da november 2008 da la vischnanca da Churwalden, vegn approvada.
Donat: La revisiun parziala da la planisaziun locala "Pro Grand" da la vischnanca da Donat dals 27 da november 2008 vegn approvada.
Grüsch: La planisaziun d'utilisaziun "Trutwis" da la vischnanca da Grüsch, ch'era vegnida concludida ils 18 da december 2008, vegn approvada.
Giuvaulta: En la vischnanca da Giuvaulta vegn fixada la sveltezza maximala entaifer l'entir vitg a 30 km/h ed introducida ina "zona da tempo 30" integrond la via chantunala.

Contribuziuns chantunalas a differentas instituziuns
Center da furmaziun per la sanadad ed ils fatgs socials, Cuira: Il project da construcziun per l'installaziun d'in detectur d'incendi cun surveglianza totala en l'alloschi Salufer dal center da furmaziun per la sanadad ed ils fatgs socials a Cuira vegn approvà e sustegnì cun ina contribuziun chantunala da 95'000 francs.

Projects da vias
La regenza ha approvà totalmain 805'000 francs per construir e per sanar il suandant traject da via:
- via naziunala A28: planisaziun e projectaziun da la centrala Dalvazza, sviament da Küblis

Gremi: regenza
Funtauna: rg chanzlia chantunala dal Grischun