Glindesdi, ils 16 da mars 2009, ha gì lieu sin l'areal dal Kantengut da la scola auta da pedagogia dal Grischun (SAPGR) a Cuira l'emprima badigliada uffiziala per engrondir e per adattar ils edifizis dal lieu da scolaziun.

La SAPGR ha surpiglià l'onn 2003 las localitads da l'anteriura scola da dunnas sin l'areal dal Kantengut a la Scalärastrasse a Cuira. Dapi quella giada porscha la SAPGR sco suletta instituziun dal chantun Grischun scolaziuns per persunas d'instrucziun. Actualmain frequentan 245 studentas e students la scola auta.

Per ademplir sias incumbensas basegna la SAPGR dus auditoris, en ils quals in'annada da scolaziun po vegnir instruida mintgamai communablamain. Ils novs auditoris èn situads directamain sper ils locals da gruppa. Quai permetta da realisar las furmas d'instrucziun giavischadas en gruppas grondas e pitschnas. Ultra da quai è planisada ina nova mediateca, che duai sa laschar cuntanscher facilmain e che porscha avunda plazzas per lavurar. La nova mediateca duai daventar in lieu da scolaziun central, nua che las studentas ed ils students survegnan in access direct a las medias ed a la litteratura, uschia ch'ellas ed els pon lavurar independentamain.

Il project qua avant maun da l'architect Pablo Horváth, Cuira, persvada tant areguard sia concepziun sco er areguard sia funcziunalitad ed areguard sia economia. Il project resguarda las structuras existentas ed extenda il program da spazi moderadamain per 1100 meters quadrat. Tras la fatschada en betun natiral fa la materialisaziun in connex cun il stabiliment existent. L'avertura dal nov tract cun ils auditoris e cun la mediateca vegn fatga sin il plaun dal foyer existent, e quai da la vart, per lung da l'aula odierna. L'edifizi d'engrondiment resguarda il standard da minergia. I vegn fatg quint cun custs totals da 5.8 milliuns francs. Suenter in temp da construcziun da circa in onn e mez èsi previs d'inaugurar l'edifizi la stad 2010. Il cussegl grond aveva approvà il project ed il credit l'avrigl 2008.

Cun questas mesiras architectonicas po la SAPGR optimar cleramain la furmaziun da basa da sias studentas e da ses students ed a medem temp po ella realisar las furmaziuns supplementaras da las persunas d'instrucziun. L'edifizi annex ch'è previs correspunda als basegns actuals d'ina instrucziun ad ina scola auta e permetta a la scola da realisar en moda effizienta sia incarica legala da prestaziun. L'edifizi d'engrondiment vegn a rinforzar la SAPGR, ch'è la suletta instituziun trilingua sin il champ da furmaziun naziunal, e vegn a crear uschia la basa per ina instrucziun da scola primara en tuttas trais linguas chantunalas er en il futur.

Infurmaziuns:
Markus Dünner, architect chantunal, uffizi da construcziun auta, tel. 081 257 36 31

Gremi: uffizi da construcziun auta dal Grischun
Funtauna: rg uffizi da construcziun auta dal Grischun